11歲漫畫妹畫壇明日之星

年紀輕輕，剛滿11歲的Anthea妹妹，終日以畫畫為樂，自9歲開始就在網絡世界發布作品，她的創作包括4格漫畫、西洋畫作，仲有各類手作仔添，幅幅都畫工精細，甚具創作天分，分分鐘會是畫壇明日之星，前途無可限量！

小畫家Anthea媽媽Ethen也擅長油畫，囡囡就遺傳了媽媽的藝術細胞，自3歲開始習畫。Anthea最初只是隨便畫，閒時又愛拿媽媽的珍藏漫畫當公仔書看，於是逐漸形成愛畫漫畫的喜好，她說：「我最鍾意畫漫畫人物，平時都係睇吓高木直子嘅書，參考一下，不過我畫嘅公仔都係自己諗o架，而且我只畫女仔，從來都唔畫男仔。」後來Ethen又安排女兒上西洋畫班，所以Anthea唔單止畫漫畫得，連水彩畫、Acrylic都一樣掂。囡囡平時仲會發揮創意，自己畫一個私家版大富翁遊戲、餐廳Menu等。Ethen見女兒畫得不錯，便鼓勵她寫Blog，又挑選部分畫作放上網，紀錄她畫畫和成長的階段。

一畫無停手

她的Blog吸引眾多喜歡畫公仔的哥哥姐姐關注，成為她的粉絲，各位仲大讚Anthea嘅藝術天分，為佢打咗支創作強心針。其實Ethen亦有意讓囡囡在畫壇發展，而阿囡當下鍾情畫畫嘅程度，已到達不能自拔嘅地步：「佢真係日畫夜畫唔停手，任何時候都畫，有時候做功課畀佢五分鐘Break，佢都要爭取嚟畫畫。」難怪一開個Blog就見到呢句說話：「最驚媽咪警告我：你再係咁日畫夜畫我就以後都唔畀你畫！」

網址：http://hk.myblog.yahoo.com/antheazz