師傅到！SideShow 1/6 Yoda
每當聽到「願原力與你同在」，就知Jedi駕到，不過今次唔係Obi-wan或Skywalker，而係一眾Jedi嘅大師傅、德高望重嘅Yoda大師。最正係今次Yoda終於以1/6 Figure亮相，配備可動關節及豐富配件，原力之大，絕非情景模型或搪膠公仔可比！
小個子多關節
雖然Yoda係Jedi嘅精神領袖，但商品化嘅程度與聲望不成正比，或者受「的骰」身形所限，多數只係出情景模型、LEGO或者Kubrick，或者你會記得Medicom都出過1/6 Figure，不過似半可動搪膠公仔多過Action Figure。今日終於等到SideShow出手，為大師開發一個新素體，喺只有5.5吋高嘅Body內，有多達24個關節，頭、手、腳都識郁，就連腰板都可以挺直，或者變做駝背Look，可動性係歷年最高！
求真布偶Look
今次SideShow以《星戰》第四至第六集做藍本，所以Yoda面相唔似前傳咁「逼真」，反而似布偶公仔，個人認為要忠於原著，此舉無可厚非，如果髮鬢位改用植毛，效果更佳。服飾向來係SideShow較弱一環，Yoda都唔例外，麻衣有啲衣不稱身，幸好配件搭夠，除咗四對可換手掌及兩對可換腳掌，仲有拐杖、枯木及蛇仔各一條，銀彈充裕嘅話，大可買埋不日推出嘅沼澤小屋，重現《星戰》第五集嘅情景。
查詢︰2388 4677（玩具狂熱）
$580
配件有頸鏈及小腰包，但冇光劍，粉絲一定失望。
依足原著，腳掌只有三隻腳趾，褲腳的流蘇位做得唔錯。
根足電影設定，Yoda大師的身高比白兵相差一大截。
《星戰》第五集中，Yoda係大駝背，呢點Figure都照顧到。
頭雕合格，只嫌過於慈祥，唔夠威嚴。
除咗有拐杖，仲跟埋Fit晒手形嘅特製手掌，揸得穩！
附有枯木及小蛇，同之後出嘅沼澤小屋襯到絕，蛇仔仲內藏鐵線，任你「打蛇餅」。