Chat Room

Vincent

相信廣大阿仙奴球迷都同小記一樣，經歷咗悲慘嘅3月14日。繼聯賽盃完場前蝦碌失球、歐聯零射門全敗巴塞之後，連足總盃八強都要輸埋畀殘陣嘅曼聯，之前雄心壯志嘅四冠美夢又再次幻滅。最慘係見到愛隊對住強敵巴塞、曼聯完全唔夠踢，後防頂唔住之外，連引以自豪嘅地面組織都不復見，中場搓兩腳就甩，真係睇到心都酸埋。唔該阿記班後生仔生生性性，喺大直路唔好再甩碌，攞個聯賽冠軍慰藉吓我哋呢班球迷啦！

Alfred

小記係《無雙》迷，基本上任何《無雙》遊戲我都會照殺照煲，不過要數瘋狂程度，就一定唔少得《三國無雙》同埋《戰國無雙》嗰份。事關小記當年出PS2、PS3、甚至係Wii，都係因為呢隻Game，真係名副其實嘅護航大作！話說上星期四係《無雙》十周年大作《真‧三國無雙6》出街嘅大喜日子，小記一收工就出旺角買Game，不過買咗都要忍手唔開住，因為今個星期有勁多篇大稿要交，新Game一旦開封，睇怕會即時走火入魔，不能自拔！所以，死都要忍手，等下個星期先同你搏命！

貓科

平時返工搭巴士地鐵，不時見到有人拎住部PMP，喺個3、4吋芒仔煲劇睇戲，但一來畫質差、二來屏幕細，睇得超辛苦，日本人喺呢方面就有要求得多，故連芒嘅手提BD機一向有市場。Panasonic就會在日本推出新一代嘅連8.9吋芒手提BD機DMP-B200，兼播BD、BD-R、BD-RE及DVD，就算是以AVC規格燒錄的光碟亦難不倒它，同時備有SD卡插槽，可隨時聽歌睇相，每次完整充電後能運作約4個小時，不過售價高達60,000日圓，約HK$5,700。