《風》之炮艇精密着陸

慢工出細貨嘅Bandai Formania系列，以精雕細琢嘅機械構造，加上唯美造型，質素超越普羅大眾對玩具嘅印象，就算開價逾千元都賣斷市。對上兩款Formania都係高達MS，仲以為佢係高達專有系列時，第三款竟然大轉彎，改玩宮崎駿名作《風之谷》嘅「飛行炮艇」Gun Ship，繼續玩精密之餘，仲出人意表！

喺《風之谷》故事中，除咗女主角娜烏西卡身處嘅風之谷國，其他國家都有唔同顏色、Size嘅Gun Ship存在，不過要數「雙座式」Gun Ship，就只有風之谷國呢一部，戰鬥力同機動性都係最強，要將Gun Ship商品化，呢部雙座式梗係最熱之選。

超精密駕駛艙

筆者開盒，第一時間已經畀Gun Ship嘅雙座內櫳深深吸引住，事關無論前、後座，都有齊座椅、操縱桿、機關槍手柄、發光儀錶等細節，精密度比起戰機模型一啲都唔輸蝕。而且女主角用王蟲眼殼製成嘅弧形窗，以及機身所有擋風玻璃，雖然唔係玻璃製成，但透明亞加力膠一塊都冇刮花或者污糟，QC夠晒嚴謹。另外，機頭嘅兩門主砲，以及機底嘅排氣喉都用咗金屬銀，相當有質感，如果機身表面嘅螺絲加啲鐵銹色，機翼又多番啲油漬及風痕迹，咁就十全十美。

美中不足欠機師

講完外表，就要講吓Gun Ship有咩Gimmick，最正就係機翼嘅可動位，將翼端向外輕輕拉出，翼上嘅組件就會逐塊伸出，好似雀仔嘅羽毛翼咁款，而且每一節之間，都清楚睇到有塊透明膠片連接。除此之外，無論機翼及機尾底部，都有伸縮車轆，加埋特別設計嘅專用台座，想擺着陸或者收轆起飛嘅形態都冇問題，可惜冇跟任何駕駛員，亦冇跟多部同比例嘅滑翔機，爭咗些少人氣囉！

查詢：2388 4677（Toy Hunters）

《天空之城》接棒

似乎宮崎駿筆下嘅機械設定，已經唔再停留於精品擺設咁簡單，呢頭Bandai出完Formania版Gun Ship，嗰頭出開軍事模型嘅日廠FineMolds，將於四月下旬推出模型版「巨神兵」，而且標榜唔使膠水、「齋啪」就掂，手部關節仲似百足咁款，可以逐節郁，相當好玩，不過香港唔係間間模型店都會返貨，想入貨，最好搵定有日本代購服務嘅舖頭幫手。

你要識!

娜烏西卡（《風之谷》女主角，風之谷國小公主。）

* 故事設定為16歲，個性善良又勇敢，擅於駕駛滑翔翼，甚具「風性」，還具備和王蟲溝通的能力。

* 於多魯美奇亞軍隊的侵略中被擄走，逃走時掉落腐海底部，發現腐海與王蟲秘密。

* 故事後段敵人以小王蟲誘使王蟲群攻擊風之谷，娜烏西卡解救小王蟲，並以身作則制止王蟲群而犧牲，最終冷靜下來的王蟲群，以淨化之力救活娜烏西卡。