識歎少爺 睇海景食雞飯

「海景有價」，但凡住屋、餐廳、寫字樓坐擁無敵靚景，必定升價十倍，偏偏尖沙咀海港城內有兩間新食肆─「海南少爺」及「Bo-Lo'GNE Café」，無需高昂消費，都有海景任睇，幫荷包慳番唔少。大家不妨Shopping前後去開餐，補補腳骨力。

近期食壇掀起一股東南亞熱潮，其中，開業僅半年的「海南少爺」，就由銅鑼灣開到尖沙咀，過對面海Shopping依然食到馳名的海南雞飯。

延續中國風布置

海南少爺初登場時，以中價但優質的海南雞飯彈起，配合大玩China Chic的環境，以及維港絕色，迅即成為人氣餐廳，晚晚大排長龍。短短半年間，選址海港城再開新店，延續氣勢。老闆之一的Tony指新店跟銅鑼灣店的設計差不多，同樣有中式元素，例如配合少爺形象的雀籠吊燈、屏風、水墨壁畫等，附庸風雅。

由於新店多一家大細的食客，故牆上不乏中國小孩畫像，色彩繽紛，神態生動，多添幾分可愛。長長的店子甚為光猛，難得沒有密集式座位，開餐時特別舒服，餐廳更闢出一隅作VIP房，可擁私人空間。而望向盡頭的落地玻璃，便可看到維港景色，對着靚景食飯，一嘗做「少爺」滋味。

自製豆腐做中菜

為配合新店，Tony表示餐牌亦有所改動：「我覺得開業時的餐牌未夠完善，早前就同師傅去過新加坡、馬來西亞，試勻出名菜式，又請教當地師傅的做法，依家個餐牌有6至7成屬新出品。」除了馳名的海南雞飯、叻沙，還新增了新加坡炒貴刁、馬來西亞蝦麵、少爺口水雞、醉轉彎及自製黑松露豆腐等。問到「少爺」新店為何供應中菜，他解釋海南雞飯其實是源於中國，而餐廳布置亦偏向中式，所以想中菜及東南亞菜並重。

其中推介首選為馬來西亞蝦麵及自製黑松露豆腐，Tony滿意說：「蝦麵湯底可謂落足料炮製，熬湯的蝦及水的比例是1：1，湯頭很濃郁，就像是飲蝦湯一樣，另外我們自製了豆腐，嫩滑而充滿豆漿及雞湯味，加上黑松露醬及黑松露片，香味突出，好多客食完都大讚。」餐廳除引入東南亞食材，亦花心機自製豆腐及多種醬料，更會研究煮出美味的方法，雖是食壇新丁，但誠意度卻滿分。