C3開催 朝聖日誌

每年香港動漫節都吸引唔少Animate粉絲捧場，不過講到日本動漫加玩具嘅元祖級盛事，就一定非每年盛夏於日本東京舉行嘅「C3×Hobby展覽」莫屬；想朝聖都唔一定要年年儲錢飛日本，皆因事隔兩年，港版「C3日本動玩博覽」又返嚟喇！今年除咗移師會展，仲請咗唔少日本動漫界、藝能界名人參與，仲有唔少平時喺香港好難買得到嘅動漫精品，總之今、明、後三日都有驚喜。

Day1 11/3：焦點：AKB48教你跳萌舞

AKB48嘅Team A中三位成員——藤江麗奈、大家志津香以及岩佐美咲，將會出席才藝表演大賽，做評審兼表演嘉賓，當然唔少得握手會。接住就有《高達UC》創作人福井晴敏嘅Talk Show，會場仲搶先免費播映OVA第三集《拉普拉斯的亡靈》，不過會場座位有限，記得盡早入場霸位。

Day2 12/3：焦點：《00》歌后炒熱氣氛

主力集中喺幾場專屬演唱會，包括女子組合SKE48中Team E成員第一場香港Live演唱會，以及水樹奈奈胞妹，演唱人氣卡通《魔導少年》女歌手Daisy×Daisy嘅演唱兼握手會，就連唱《Seed》及《00》唱到街知巷聞嘅歌后石川智晶都喺當日開Show。另外《Macross F》金牌班底嘅河森正治同埋江端理沙，將會對談《Macross F》世界，分分鐘可能透露埋OVA《戀離飛翼》嘅珍貴情報。

Day3 13/3：焦點：壓軸動漫大匯演

最後一日，卡士可謂最強、人氣最鼎盛。先有殿堂級聲優古谷徹，夥拍《漂靈》中人氣聲優森田成一，對談劇場版《漂靈：地獄篇》嘅合作心情。河森老師就將會聯同《機動警察》機設大師天神英貴，分享卡通機設計靈感及意念。壓軸演唱會就有唱《龍珠》嘅影山浩宣、《勇者王》嘅遠藤正明、《舞乙Hime》嘅栗林美奈實與《你是主人我是僕》嘅橋本美雪等，唱足兩小時，$30一張入場券，乜都抵番晒！

特色戰利品

除咗「觀星」、聽歌及一睹動漫大師嘅廬山真面目外，嚟得C3，點都要搵啲戰利品先算滿載而歸，不過要講晒所有場內精品，真係成張報紙都講唔完，為免花多眼亂，筆者就列出以下精選，相信總有啱你心水嘅Hot Item。

活動小資料

名稱：C3日本動玩博覽2011

日期：即日至3月13日

時間：今日3pm-9pm

12日11am-9pm

13日11am-7pm

地點：香港會議展覽中心

Hall 3FG

入場費：$30

（憑門票可攜同一名11歲或以下小童進場）

查詢：2418 8881

古谷 徹（日本知名聲優與口述員）

* 1953年於神奈川縣出世，小學六年級已為《海賊王子》配音，68年聲演動畫《巨人之星》的主角星飛雄馬。

* 1979年聲演《機動戰士高達》的男主角阿寶，自此聲名大噪，其後亦成為《聖鬥士星矢》中星矢的聲優，並曾與其他聲優組成樂隊。

* 近期作品包括《犬夜叉》的四魂之玉、《戰國BASARA貳》的小山田信繁，以及《漂靈》的朱蓮等。