日版Iron Man細細粒易擺Pose

提起Iron Man，除咗羅拔唐尼嘅精彩演出深入民心外，Hot Toys嘅電影版12吋Figure更加鬼斧神工，不過由Mark I到VI都標價過千銀，唔係個個玩具迷承受得起。日本嘅山口式特攝系列最近就出咗Iron Man Mark VI，雖然高度只有155mm左右，不過造型及配色都相當討好，加上更勝12吋Figrue嘅超強可動性，二百蚊多啲就有交易，唔只係近期山口式特攝系列嘅出色之作，仲成為「鐵甲迷」至抵嘅入貨之選。

性價比突出嘅山口式Mark Ⅵ，上色嘅精緻度同主流嘅12吋Figure相比，雖不及亦不遠矣，雖然裝甲配色用咗大路嘅金屬紅及黃銅色，感覺唔似電影版嗰種金屬質感，但亦做到漫畫及卡通入面嘅Colorful感覺，只係胸口嘅能量心臟三角嘜冇用到透明件，少咗份晶瑩剔透嘅效果。

股位關節再進化

另一方面，山口式關節出晒名任扭任舞，今次仲精彩，股位接合處分成兩件Parts，實現腳部90°屈曲兼打八字坐姿，仲可以填補關節之間嘅空隙。不過為咗遷就彎腰，腹部做到昆蟲肚咁款，仲有手腕Ball Joint嘅穿崩位，都係美中不足所在。

特效氣團有Gimmick

12吋Figure勝在造型精緻，山口式版本都唔輸蝕，可動性高幾班之餘，仲大送特效組件。Iron Man靠噴射推進，所以噴射台座及火燄組件一定唔少得，而且最近嘅山口式台座設計已經唔再獨沽一味，只係半透明特效件咁簡單，繼上次初號機嘅發光台座後，今次Mark Ⅵ嘅噴射氣團台座，兩邊氣流有Ball Joint連接，可以左右調校氣團嘅擴散程度，有心思！除此之外，手背外甲改用軟膠設計，令手掌向外屈曲時，就算外甲冇關節位，亦可作一定程度掀起，夠晒成本效益，唔怪得市面已經瀕臨斷貨邊緣啦！

查詢：2148 9483（精品）

積克船長接棒

除咗Iron Man，山口式將會再向荷里活角色埋手，《魔盜王》嘅積克船長將於下月登場！就試辦圖所見，服飾及船桅形嘅台座都做得幾仔細，不過面相塗色重手咗，尤其是眼影部分，搞到似殭屍多過似Johnny Depp喎！