西貢似布吉易容泰菜

星期日，風和日麗，陽光充沛；望住窗外藍天白雲，突然懷念泰國嘅陽光與海灘，好想讓和暖陽光滲入肌膚。於是，我鼓起勇氣，一個人飛……「車」入西貢白沙灣新開的泰國餐廳「二泰太」，响陽光底下Hea食一個Lunch，仲可以同泰籍廚師哥哥切磋一下泰文，「妻」吓「猜」吓，直頭好似飛咗去布吉咁!

餐廳叫「二泰太」，係老闆Johnny第二間泰國餐廳，大婆「泰太廚房」在大埔開了幾年，無論環境同食物都跟這個阿二有別；我就鍾意這位「二奶」多啲，裝修靚之餘泰味濃厚，露天位置更有一架「篤篤」坐鎮，甚有泰國Feel。

講起西貢白沙灣，少來這區的人未必有印象，但一講到「舢舨」餐廳，應該能夠喚起大家絲絲記憶，那正是「二泰太」的前身，選址於此，實在是一個有利元素。

泊篤篤「泰」好Feel

餐廳外觀恍如一間泰式Villa，外牆塗了熱情的粉紅色，充滿夏日感覺；室外環境舒適開揚，實木桌椅由泰國空運抵港，塑造百分百泰國感覺。門口還泊有一輛泰國「篤篤」，即常於曼谷街頭飛馳電掣的「的士」，亦是老闆特別從當地搜羅回來，客人大可隨便拍照，再放上「面書」扮去了一趟泰國，肯定大把人Like。餐廳分上下兩層，予人不同感覺；上層的中間位置有香薰煙霧冒出，恍如置身泰式Spa，寧靜悠閒，下層則有夜蒲氣氛，小型舞台上每晚都有泰籍歌手拉闊演唱泰文Pop或「唔鹹唔淡」的英文和國語歌，氣氛甚為熱鬧。

創意食物易容術

這裏除了環境不錯之外，食物亦甚有質素。翻開有如報紙大小的餐牌，已經令我目不暇給，最後叫老闆介紹了幾個新菜式，我就繼續同太陽伯伯玩住遊戲等食。結果食物一端上桌的時候，不禁整個人呆了︰壽司卷賣相的杧果黑糯米、飛碟麵包般的咖喱蟹肉、原隻冬蔭功燉蛋……搞鬼的「易容」招數抵畀幾個手指公！問及Johnny創意從何而來，他謂，坊間很多泰國菜館，一般都好公式化，沒甚新意，所以他希望能把地道泰國菜重新包裝，帶給食客多點驚喜。Johnny對於經營泰國菜館很有經驗，以前更差不多一個月到泰國一次，對當地飲食文化甚為熟悉，而他更將泰國人的Comfort Food介紹給我認識，原來是一種辣椒膏，食落好香但勁辣，泰國人食咩都點佢，美味得只能說一句：「泰」強喇!

泰有格Villa

雖則為一間泰國餐廳，但Villa般的裝潢比九龍城那些泰國菜館講究，每個Detail位都做到足，以配合Fine Dining格局。

查詢：2719 8798