換鏡DSLR 零距離影靚花

過去嗰兩個月真係凍到飛起，日日都着到成隻咁，好在最近終於暖番些少，就連影相嘅心情都返晒嚟！咁啱一年一度嘅花展就快到，可以睇到世界各地嘅奇花異卉，同埋五彩繽紛嘅花圃同園藝擺設，真係諗起都興奮，一於拎部換鏡DSLR夾支微距鏡來個花海大特寫。

唔知平時大家會帶咩嘢裝備去影花呢？計我話可換鏡頭嘅DSLR同無鏡相機會較啱用，因為佢哋景深較淺，可以避免太雜亂嘅背景；加上有啲花卉較細朵，用大機對焦比較方便快捷，今次就介紹幾款裝備同技巧畀大家，影花時就更得心應手喇！

微距篇

宜選中焦距微距鏡

其實花卉拍攝變化都好大，可以成片花海咁影，又或者幾朵幾朵咁影，甚至嚟個花蕊大特寫都唔錯，但要影到咁微細，就要出動微距鏡頭，當中建議大家搵啲50-100mm嘅中焦距微距鏡頭會比較好，一來相片唔會因為太廣角而出現變形；二來景深效果會較明顯，加上以感光元件起計的最近對焦距離，只是約20-30cm，近攝往往會有出人意表的驚喜。

微距燈光線更平均

連花蕊都影到，當然係好事，但有時咁近影，機身或自己嘅身體好可能會遮擋咗唔少光線，好在仲有微距燈幫手，而且坊間已有專為DSLR而設嘅環形閃燈（Ring Flash），令光線輸出更為均勻，售價也較相宜；m4/3則只有Olympus推出咗「觸鬚形」微距燈，以機身取電，左右各自有兩級光度調校。

何謂微距鏡放大率？

好多微距鏡都以放大率做賣點，佢哋所講嘅放大率就係以最近對焦距離拍攝時，主體同鏡頭影像投射出嚟嘅比較。例如放大率係1：2嘅話，即係話影像係主體嘅1/2。然而，放大率與APS-C同Full Frame機種無關，只係焦距唔同而已。

強光篇:善用CPL環形偏光鏡

天氣唔好影花會灰濛濛，陽光太猛其實一樣會出事。因為花瓣將陽光大量反射到感光元件上，令原有色彩唔可以忠實咁展現喺相片中。呢個時候，大家可以考慮加上CPL（Circular Polarizer）環形偏光鏡。佢係由兩片可轉動嘅鏡片組成，透過扭動鏡片，可以將唔同角度嘅偏光或反光，大大減弱甚至消除，從而令色彩重現眼前。

逆光篇:記得加曝光補償

影花除咗可以正面影外，唔少龍友都想換吓角度拍攝，逆光或「低炒」拍攝都係唔錯嘅選擇，不過大家要小心應付曝光問題。由於「低炒」時背景往往比主體光亮，會影響到測光的準確性，如選用自動、光圈或快門先決拍攝的話，可先加2/3級曝光補償；全手動的話則可比正常測光調高2/3級。

轉接環玩盡經典鏡頭

傳統APS-C格式相機雖然話已有良好嘅鏡頭系統支援，但好多人仍然好想試吓唔同嘅經典鏡頭。Sony NEX、Olympus同Panasonic m4/3嘅無鏡相機會係唔少影友嘅選擇，坊間已為佢哋推出各式各樣嘅轉換接環，想玩高質素如Contax或Carl Zeiss，或特大光圈嘅電影鏡頭都冇問題。

反芒之選　Canon EOS 600D

新鮮出爐嘅600D，可能係一眾Canon Fans嘅必然之選。佢唔止可以實現「飛燈」，仲有高感光嘅ISO 12800撐場，想玩Lighting定原汁原味都冇問題。加上600D有埋60D嘅3吋104萬像素反芒，玩高炒或低炒影花都咁好用。

色誘用家　Pentax K-r

無論機內機外，Pentax K系對色彩嘅配搭，可以話係玩到出神入化。佢哋最新嘅K-r將獨家嘅正負逆沖（俗稱E沖C）加入喜好設定，影相時就唔使靠撞手神啦！同時，K-r嘅相片濾鏡可以無限次重疊使用，真係想點玩都得！

入門平霸　Nikon D3100

想買DSLR，但又唔想用咁多錢，D3100就最啱使。機內都有多種數碼濾鏡，同埋支援全新嘅AF-F全時間對焦模式，拍片仲有埋追焦，操控更Easy！大品牌更有信心保證。

香港花展─《春花妙韻》

2011年香港花展主題是「春花妙韻」，展出代表初戀和希望的主題花卉「報春花」。此花品種多，色彩多為黃、白、淡紅和紫紅色，開花時會排列成傘形花序，觀感相當豐富繽紛，再配合各地花卉，以及各式各樣的花藝擺設及園景設計，帶出春天來到的訊息。

展覽小資料

地　點：香港維多利亞公園

日　期：2011年3月11日至20日

時　間：上午9時至晚上9時

入場費：$14（成人）

$7（小童、學生、60歲或以上長者及殘疾人士）

查　詢：2601 8260

查詢：（a）2833 0955　（b）2384 6698　（c）2376 2150　（d）3191 2333　（e）2926 2300　（f）2907 1122