唔使過大海 iPhone小賭怡情

香港同澳門只有一線之隔，好多朋友都鍾意過大海娛樂一番。贏到錢固然開心，不過萬一損手就喊都無謂；如果想過吓手癮都唔一定要過大海，攞部iPhone出嚟一樣得！近期最Hit嘅一定係《Jackpot Slots》，唔單止有角子老虎機遊戲畀你玩，仲可以配埋個迷你老虎機插座，隨時隨地中Jackpot，連船飛都慳番！

賭場玩意千變萬化，要玩到樣樣精都唔容易，尤其係每個國家都有當地特色，好似本地玩家就鍾情於「國粹」麻雀，以及鋤大Dee，好在AppStore夠國際化，打麻雀、鋤大Dee、老虎機，甚至連猜枚App都有得玩。

《Jackpot Slots》拉爆老虎機

老虎機易玩又唔使用腦，好多朋友去賭場都會玩。不過依家賭場就愈嚟愈少拉桿式老虎機，玩落冇手感。《Jackpot Slots》除咗係一隻老虎機遊戲之外，仲可以買埋個專用插座，插部iPhone入去，即時變身迷你老虎機，最正係有支紅色拉桿，夠晒過癮！遊戲分為5個難度，要儲夠一定分數先可以過關，睇吓你夠唔夠運中Jackpot。

下載：免費，插座另購$399（a）

《Big Two》鋤啤一挑三

四個男仔圍埋，最好梗係玩鋤大Dee，不過有時四缺一唔成局。《Big Two》係一隻典型嘅鋤大Dee遊戲，玩家要一個人應付三個電腦對手。最勁係個智能系統，玩法出奇地進取，有牌即出唔忍手，絕對考驗大家嘅技巧。據講遲啲仲會有網上模式，到時同真人對戰肯定仲刺激！

下載：US$2.99

《MotionX Dice》搖機變骰魔

就算唔識玩啤牌、麻雀都唔緊要，搖吓骰仔一樣好玩。《MotionX Dice》就利用iPhone水平儀功能，Fing吓手機嚟搖骰，最特別係內置咗36款枱面同60款唔同嘅骰仔，心心、Yes/No骰都有，想幾時玩大話骰、幸運骰都冇問題。

下載：免費

《Astraware Casino》賭場AIO

賭場內有咁多唔同嘅玩法，如果想乜都試的話，一定要單撈《Astraware Casino》。內置有11種大熱嘅賭場遊戲，包括Blackjack、3 Card Poker、Texas Poker、Roulette等等，而且仲似足真賭場，玩到咁上下會送你紀念品，幫你做埋贏輸統計，好專業！

下載：US$0.99

《Mahjong World》考你牌章

被譽為「中國國粹」嘅麻雀，風靡各地華人。《Mahjong World》貌似一般麻雀遊戲，實情大玩獨特嘅食胡方法，據稱融合咗廣東牌、台灣牌嘅玩法，所以食胡方式多達47種，自問係高手嘅一定要玩。

下載：US$0.99

《香港猜枚》土炮枚王

「十五、二十」可以話係最地道嘅玩意，唔想嗌到聲沙、猜到手攰？單撈番隻《香港猜枚》啦！遊戲只需要篤吓芒就可以出枚，除咗同電腦對猜之外，仲可以喺同一部iPhone上跟朋友互猜，夠晒互動，而且連背景圖案、語言都勁地道，香港人必撐！

下載：US$0.99

查詢：（a）2135 6963