打造萌爆女子組合 《THE IDOLM@STER 2》

今期AKB48紅到發紫，好似前田敦子已經有得拍日劇，前幾日大島優子襲港更成功俘虜萬千港男。雖然以AKB48為名，去年底出咗隻PSP遊戲《如果和AKB1/48偶像談戀愛》，但今次介紹嘅係虛擬版偶像育成遊戲王牌續集《THE IDOLM@STER 2》，玩家再次變身偶像組合經理人，一手一腳將一班妹妹仔捧紅成為「國民偶像組合」，萌到爆！

原屬日本街機遊戲的《THE IDOLM@STER》，07年1月率先移植到Xbox 360，銷量以及道具下載量都非常突出，繼後喺08年推出過Xbox 360版《THE IDOLM@STER Live for you!》、09年出NDS版《THE IDOLM@STER Dearly Stars》及PSP版《THE IDOLM@STER SP》，而今次再次回歸Xbox 360的新一集就係真正嘅續集。

自組最紅偶像組合

咁新一集又玩啲乜？玩家要a再次化身成為經理人，組織一個偶像團隊，不過就冇AKB48幾十個人咁大陣仗，而係三人組合，培養及發掘隊員之間的默契以及跟經理人的曖昧關係，然後透過在日本巡迴表演及參與各種演出來提升人氣，目標係要成為全國最受歡迎嘅偶像組合。

9位女角爭上位

《THE IDOLM@STER 2》講得上係正統續集，班底跟第一集時大致相同，由坂上陽三跟大村純製作，窪岡俊之與田宮清宮擔任角色設定，而故事背景更設定喺前作一年之後，不過現實世界就已經過咗四年。今集玩家所隸屬嘅「765製作公司」喺上集並冇出現，但可挑選的9個妹妹仔就同上集相近，不過話晒遊戲時間都過咗一年，角色都成熟咗，好似天海春香就已經17歲，雙海真美都讀緊中學，而且遊戲的着色、動畫手法以至光影效果都變得更成熟，尤其係上台載歌載舞的演出，就幾有電視台效果。

約會提升合拍度

遊戲玩法話易唔易，話難又唔算太難，除了要搵齊3個妹妹仔組成偶像組合外，作為經理人的玩家每星期更要準備好預算及安排活動，以提升歌迷數目及注目度，並且可以從中賺錢。同時亦要諗計仔加深佢哋嘅默契和提升團結度及能力值，包括在公在私約會其中一人深入交流以增加「回憶」力。平常冇Job做時可經由訓練課程，提升「打扮」、「歌唱」、「外形」及「舞蹈」等能力，到正式上台表演時就可以傾盡全力發揮，更有機會跟死對頭組合在台上一較高下，其實都幾忙。

私人演出儲道具

除咗主線內容外，遊戲還加入「Stage for you!」特別模式，可以任揀5個妹妹仔上台表演，由服飾、舞台及歌曲等各方面都可以自行調配，為自己安排一場Private Show，而且可以蒐集到更多道具，不過筆者就唔係太接受到佢哋含住奶嘴跳舞囉！

遊戲檔案

名　　稱：《THE IDOLM@STER 2》

類　　型：偶像養成

開　　發：Bandai Namco Games

平　　台：Xbox 360

推出日期：已推出

售　　價：$298（普通版）、$398（限量版）

查　　詢：2359 7998