台迷必看　搞笑寶島輔大猴

近年愈嚟愈多港人鍾意去台灣，無他嘅，當地消費無論飲食定交通都唔算貴，而且治安同民風唔錯，又盛行民宿，係三五知己自由行嘅好去處。不過除咗台北行夜市、九份睇風景同墾丁嘅無敵海景外，其餘的地方對於港人來說仍是相當陌生。想玩得深入啲，正路嘅可靠當地旅遊局嘅小冊子同網絡推介，但內容大多沉悶，引唔起大家興趣，小記就推介台灣輔大猴嘅Blog。

卡通插畫夠得意

Blog主以一隻紅色猴子做Icon，睇落相當受落，而且符合時下年輕人所講嘅「有圖有真相」，主要介紹台灣境內唔同鄉縣嘅活動同好去處，仲要係相多過字，等大家可以感受到當地氣氛同風景外，仲會細心咁教埋大家乘搭交通工具，咁就唔怕唔識去啦！而沉悶嘅資料介紹部分，輔大猴仲會好抵死咁加埋插畫同編者自編嘅對白，真係好鬼得意，又易於閱讀！輔大猴喺台灣嘅人氣相當高，就連台灣鐵路都搵佢幫手，粉飾平溪線火車外觀，你都咪話唔勁！

另外，Blog裏面嘅內容種類亦唔止台灣旅遊咁單一，仲有一啲社區小活動同電影介紹。早排佢就介紹台北市鄰近嘅新北市區活動，大家唔使來來去去都係士林、忠孝區咁悶；後者則比較休閒，仲有輔大猴嘅日記同漫畫，靈感來自大猴身邊嘅趣事，加以漫畫化同大家輕鬆一下，睇到你會心微笑添！

網址：http://www.wretch.cc/blog/fjumonkey