懸疑《Catherine》草食男玩出軌

古語有云：「男人三十而立。」不過喺現今社會，一個男人就算到咗三十歲都依然可以吊兒郎當，往往事業無成，兼身邊有個拍咗拖一段時間嘅女朋友，唔想結婚拖得就拖，但又貪新鮮想識吓其他女仔。呢個咁寫實嘅情節，就畀開發《真‧女神》系列聞名嘅ATLUS，以精彩嘅故事布局同考你反應嘅動作解謎，開發出具成人風格嘅《Catherine》。

大家買Game嗰陣千祈唔好畀佢嘅封面呃倒，以為《Catherine》係隻「18禁」H Game。事關咁大膽嘅封面只係象徵意義，正正表達咗男主角徘徊於專一與不忠嘅兩難局面，迷失於情慾之間嘅處境，相信識睇些少日文嘅朋友一定會被故事劇情深深吸引，而鍾意挑戰難度嘅解謎玩家亦唔會錯過。

一夜情後晚晚發噩夢

話說優柔寡斷嘅系統工程師男主角Vincent，被拍咗拖5年嘅OL女友Katherine逼婚。某日於酒吧飲悶酒之際，邂逅同女友名字發音相同嘅神秘辣妹Catherine，兩人打得火熱兼發生埋一夜情。但係自從遇到Catherine之後，Vincent晚晚發噩夢，同一時間小鎮上接連發生後生男仔神秘死亡事件，到底噩夢同死亡事件有冇關係？Vincent又會選擇同Katherine結婚，定係同Catherine一齊呢？就算係揀分手，又會唔會不得好死呢？咁多問題，就要大家代入Vincent嘅世界，展開人生冒險。

覆SMS決定發展路向

遊戲中AVG部分就係構成故事劇情嘅主要骨幹，平時Vincent嘅活動範圍主要响酒吧中進行，他可以同酒吧中嘅人傾偈，仲可以得到有用情報。而且Vincent嘅手機會不時收到Katherine同Catherine嘅SMS，輸入唔同嘅選擇會影響往後二人嘅親密程度。其實無論係過場劇情、同人談心定係覆SMS，Vincent都會不斷面對選擇，唔同嘅回應會反映至畫面內嘅天使惡魔計，而上面指針嘅擺動，又直接影響故事嘅結局。由於隻Game有成8個Ending，所以要玩晒所有Ending都要花啲工夫。

拎枕頭爬塔避夢魘

去完酒吧飲完酒，就會進入故事中嘅Action部分，夢中嘅Vincent會跌進噩夢世界，拎住枕頭、身穿孖煙囪、頭戴羊角，挑戰限時解謎爬塔遊戲。其實基本上爬塔規則好簡單，大家利用推拉方塊嘅方式，為Vincent製造出向上攀登路線，不過爬塔之餘要同時間競賽，每過一段時間高塔底部會逐少消失，另外塔上會有羔羊擋路，仲有怪物由下而上追殺Vincent，過程相當刺激。由於Game Over係唔可以續關，所以每次爬塔嘅首要任務，就係拎SavePoint道具「枕頭」，有咗佢就可以無限次續關喇，大家要好好記住呀！

遊戲檔案

名稱：《Catherine》 人數：1人

平台：PS3、XB360 開發：ATLUS

類型：動作+文字冒險 日期：已推出

售價：$458（PS3）（a）、$599（XB360）（b）

查詢：2341 2356（a）、2710 8825（b）