on.cc 東方互動主頁

火速返貨EOS 600D A+模式媲美Photoshop

相信大家細細個讀書時，都想考試攞100分，操行拎A+。今次EOS 600D亦都新加咗「A+」智能自動場景模式，會醒目地幫大家優化相片嘅光度同色彩，而且仲有埋60D嘅反芒同7D嘅閃光燈系統，以及多種數碼濾鏡同色調調校功能，操控千變萬化，要影A+靚相真係按個掣就有！

估唔到早前喺日本CP+見到嘅Canon EOS 600D，話咁快就已經喺香港開售，仲提供咗淨機同兩款鏡頭套裝以供選擇，當中18-55mm鏡頭更屬全新設計，加強防震功能，針對升級或入門用家嘅唔同需要。

智能優化免執相

今次EOS 600D新增嘅「A+」智能自動場景模式，原來係獨家嘅場景偵測系統，能夠綜合分析多方面嘅拍攝元素，包括主體、面孔、色調、飽和度、主體動態、距離同光暗反差等資訊。而「A+」智能自動場景模式更會因應系統綜合後嘅資訊，醒目地調節白平衡、相片風格同亮度優化。當中以最常用到嘅人像、令人嚮往嘅藍天同誘人嘅黃昏拍攝最為耍家，相機會自動地將人像膚色光暗變得均勻、強化大自然的天藍和草綠色的飽和度，或者對日落時的暖色調產生更多變化，直情好似機身內置咗Photoshop一樣咁厲害。

濾鏡色調任你玩

除咗有「自動波」嘅A+模式外，大家得閒仲可以玩埋「棍波」式嘅Basic+創意效果，佢可以喺人像、風景同運動等基本拍攝模式中，加入唔同嘅氣氛效果，包括有鮮艷、柔和、暖色調同單色等9種效果，再混合埋白平衡色調，變化相當之多！此外，EOS 600D亦學60D喺Play Mode中，加入創意濾鏡功能，並新增多一款魚眼效果，連埋原有嘅粗糙黑白、柔焦、玩具相機同模型效果，總共有成5款咁多，可作不同級數的設定之餘，仲可以無限次重疊使用，真係有排玩。

拍片支援10倍變焦

今次600D也引入唔少進階功能，選用咗超高嘅1,800萬像素CMOS同新一代DIGIC 4影像處理器，可以輸出高質素嘅14位元類比色彩，進一步提高色域嘅輸出同埋將感光值提升到ISO 12800，試影後發現效果相當唔錯！加上，EOS 600D選用咗跟7D相同嘅iFCL（Intelligent Focus，Color，Luminance）測光系統，具備63區雙層測光感應器，可以讀取亮度同主體色彩資訊，令測光更加準確，機頂閃光燈仲可以操控兩組外置閃光燈；拍攝1,080p@30fps全高清短片時更能作3-10倍嘅「數碼變焦」，就算拎住支18-55mm套裝鏡，都可以拍攝到超遠嘅550mm距離呢！