李家仁×李紫昕　小小兒歌大道理

這一邊廂，李家仁醫生的《小明上廣州》無章法的Rap熱爆YouTube；那一邊廂，兒歌天后李紫昕則以抒情優雅的曲風囊括不少兒歌獎項。雖然曲風、內容各走極端，但兩人旨在帶給人們正能量、盡情玩音樂的澎湃熱情，無論大人同小朋友都會喜歡。

仁：李家仁　紫：李紫昕　Q：記者

Q1：你們認為兒歌是甚麼？

仁：兒歌最緊要是帶出正面訊息，聽起上來開開心心。由得不同年紀的人聽後獲得不同感受。不喜歡說教式的兒歌，咩刷牙歌呀、洗手歌呀，阿媽講過、幼稚園又教過，不用三番四次再提了吧！嚟緊作詞人韋然會寫首Rock味濃的《小明去東莞》，統統由得他自由發揮；反正唱的人開心，聽的人也開心就得喇！

紫：對呀，開心、意識正面就好！兒歌能夠記錄小朋友成長，每個人都有自己聽兒歌的回憶。近來，我創作兒歌都減少說教，着重帶出親情、友情等溫暖的訊息。

Q2：《小明上廣州》Hit爆，你們認為原因何在？

仁：其實都有點意料之外，3天30萬點擊率令我興奮莫名。去年適逢亞運，廣州變得多人談論，突發奇想着韋然寫此歌，可能與時代緊扣，加上Rap歌詞順口、易記，咁就得咗！

紫：好鍾意《小明上廣州》，一播就會令氣氛變得好開心。李醫生，你等陣要送多隻CD畀我，錄好新歌記得通知我，讓我可以在節目裏播放，但其實小明係邊個呢？

仁：小明可以是任何人，是他也是你和我（不禁唱起歌來）。記得有人曾經問過，會否有《小明去拍拖》，我可以講絕對不會！嘩！6歲的小朋友怎會識談戀愛呀？

Q3：你們最喜歡自己哪一首兒歌？

紫：近期最喜歡替快將上映的電影《喜羊羊與灰太狼之兔年頂呱呱》創作的電影主題曲《天空與夢想》，這首歌加添了一點久石讓的感覺，曲風較煽情，配合戲中角色對父母親的思念，創作時也被感動。這首歌讓我第一次於內地獲得珠三角童謠金獎，意義重大。

仁：喜歡《搭叮叮》，因為那是紀念我媽媽的歌，每次唱都會喊。

Q4：有甚麼說話想跟90後、甚至Y世代講呢？

仁：少看YouTube，多看幾本書。小一就拎住部iPhone，啲家長真的太Over-protective，互聯網上資訊又快又多，轟炸式逼你看，根本就應接不暇；閱讀就唔同，看書讓你有想像和思考的空間。

紫：對呀！有互聯網後小朋友接觸書本機會確實比以前少，但如果他們肯利用iPad睇吓書，你話幾好呢！

後記:繼續期待小明

當知道李醫生要灌錄英文版的《小明上廣州》、《小明去東莞》，以及不肯透露目的地的《小明上××》，小記簡直想立即將訊息發布出去。問李醫生會否因為網民惡搞《小明上廣州》的歌詞、又或者追問「小明點解這麼久都不返香港？」這些問題而嬲怒？李醫生即笑笑口答：「點會嬲呀！難得他們運用創意，你估填詞咁易呀！」李醫生的小明系列，委實全城萬眾期待啊！

李紫昕 Profile

別號：Purple姐姐

年齡：秘密

狀況：未婚

職業：電台DJ、

歌手、作家、主持

強項：創作、天馬行空

嗜好： 旅行、瞓覺、煮嘢食、同朋友聚在一起

＊ 最近忙着排練「李紫昕Purple姐姐與你穿梭童年時」音樂會。

好想去日本旅行，而去旅行對創作十分重要，出外走一轉，有利靈感湧現，寫歌都快好多。

喜歡陳奕迅收錄於新EP內、與王菲合唱的新歌《因為愛情》，天王天后合作果然非同凡響！

李家仁 Profile

別號：李醫生、 David

年齡：59歲

狀況：已婚

職業：兒科醫生

強項：將醫學知識簡化解釋讓大眾明白

嗜好：參與慈善活動

＊ 最近忙訪問、忙錄音、忙參與大學生活動表演，因講得太多，講到喉嚨腫晒都無得抖。

最愛收藏舊兒歌歌集，裏面啲歌詞好文縐縐，以前一得閒時就攞住本歌集嚟唱，依家已唱到滾瓜爛熟！

麥當奴道一間餐廳，那裏的廚師好有心做菜，肯花心機作不同嘗試，令菜式配搭多姿多釆，不會流於Routine、Regular，這種堅持及態度，十分難得。