環球蠔食

朋友仔鍾意食蠔，但又覺得幫襯蠔吧肉赤，想抵食，都係揀Buffet着數，起碼可以食到回本為止。小記於是推介佢去城景國際的City Cafe，因為餐廳由3月份開始推出「蠔釀．海鮮自助晚餐」，大廚會採用廣島蠔、新西蘭及美國生蠔，除淨食外，更炮製出多款美食，比一般蒲飛更多花臣，加上可任飲冷熱清酒，今晚大可飲飽食醉！

廣島蠔鮮甜、新西蘭蠔爽甜得來帶海水味，美國生蠔則肥美濃郁，來惠顧這個自助餐，便可嘗盡環球蠔鮮。大廚還示範用上香焗、串燒、刺身、炸等方式，製作一系列美食，包括四色焗蠔、三式串燒生蠔、廣島生蠔刺身配清酒泡菜汁、砵酒焗金蠔、炸蠔黃金角等，煮法多得眼花繚亂。

冷熱清酒任飲

除有生蠔做主角，其他海鮮亦是不容錯失，必試法國黃金螺，爽脆質感加上鮮味十足；法國螄蚶入口幼嫩，鮮甜無比，尚有法國膏蟹、松葉蟹腳、法國黑殼青口等。食得豐富，又想品嘗美酒，這自助餐更有冷熱清酒無限添飲，用來配廣島蠔、刺身，一定好「和」味啦！

「蠔釀．海鮮自助晚餐」

供應期：3月1日至31日　時間：6:30pm-9:30pm　收費：成人$338、長者$288、小童$238　查詢：2783 3287

*另加一服務費