高達開始大戰永恒

為慶祝高達模型「Gunpla」30大壽而推出嘅短篇動畫《模型戰士Beginning G》，雖然觀眾對象以小朋友為主，不過對資深高達迷而言，一樣吸引，事關主角機Beginning Gundam嘅最大勁敵—Forever Gundam，後者嘅機設特色，擺明向元祖高達RX-78-2致敬。呢對創新與懷舊、開始鬥永恒嘅組合，已經同步模型化，會否挑起你嘅製作意欲呢？

Beginning Gundam白油唔慳得

先講Beginning，全身多處用咗黃、藍、紅三色做配色，顏色繽紛，而且頭部同四肢都幾圓，頗有Turn A影子，最特別係加上「三角」設計，全身連武器多個部件，都由唔同顏色嘅三角形組成。模件本身有唔錯嘅完成度，不過有唔少白色位要油，就算係「素組」一派嘅玩家，都係買定支白油補色先穩陣，最惡搞係「手指夾飛劍」，手掌連光劍組件都係透明黃，要花啲工夫先油番隻手出嚟。

Forever Gundam元祖加重料

另一邊廂嘅Forever Gundam，其實係元祖高達再加裝甲組成，如果你之前砌過HGUC版RX-78-2的話，今次砌Forever Gundam相信會駕輕就熟。最大賣點係背包嘅四連裝VSBR光束炮，可以擺出發射形態外，四支炮仲可以獨立分離，變身浮遊炮，可惜隨盒冇跟展示台，做唔番浮遊炮出擊嘅場面，另外手臂外甲嘅劍柄位有啲鬆，擺甫士時小心丟失。

查詢：2433 1828（瑞華行）