Chat Room

科技版 記者Vincent

上星期歐聯又再掀起戰幔，最令大家跌眼鏡的賽事莫過於「阿巴大戰」。賽前被大家睇淡的阿仙奴，上半場被巴塞圍攻兼且先失一球，但其後竟然憑雲佩斯、艾沙雲的入球，喺帶有些少運氣的情況之下反勝。作為阿記球迷固然開心，不過，阿仙奴上半場後防甩漏甚多，多次被巴塞的直傳成功突破越位，實在令人看得膽戰心驚。次回合阿仙奴更要作客到可以容納10萬球迷的魯營球場，肯定更加難打，喺度呼籲各位阿記粉絲一起對抗睡魔齊撐兵工廠呀！

科技版 記者marcovaldo

有買咗Kinect嘅朋友投訴話冇乜新Game玩，咁又係嘅，自從去年11月中跟Kinect同期推出一輪對應遊戲後，就再冇新Game出。但嚟緊會有隻Kinect Dance Game《Michael Jackson The Experience》，可以親身大跳MJ名曲嘅舞步，淨係呢個賣點已經夠煞，點都要買隻返嚟看門口。呢隻Game要到4月中先會推出，但喺上星期五台北電玩節時已經首度展出，全場反應更非常之好，足證有唔少玩家都好留意。

科技版 記者Boris

有幸連續兩年參與CP+相機展覽會，實在相當高興。雖然無論場地同規模都唔及德國科隆嘅Photokina，但始終係亞洲最大型嘅影像展，而且今年有更多廠商參展，心底有種說不出來嘅感動。然而，每次出差要付出嘅準備往往比本地發布會多，日頭要影定啲相做後備；半夜又要傳相同寫稿，但係經驗同滿足感亦同樣加倍，所以每次辛苦完都係覺得好有價值！