快過睇戲 HT 12" Thor

近年嘅荷里活動作電影，差唔多畀Marvel嘅漫畫英雄壟斷晒，X-Men、Iron Man部部都大收旺場；呢班英雄幾威都好，歸根究柢咪又係人一個，相比起嚟，北歐神話嘅雷神Thor天生神力兼可呼風喚雨，「神」氣得多。有別於以往落咗畫先有Figure，《Thor》五月先上映，Hot Toys版Figure依家已經有得睇，有心儲齊The Avengers嘅朋友，係時候儲定錢！

頭雕審批極速Pass

論人氣，Thor一定輸畀Iron Man、蜘蛛俠等Marvel英雄，但作為玩具，渾身肌肉嘅Thor極受玩家歡迎，無論SideShow嘅半身像，或者Mavel Select嘅七吋Figure，總有一班漫畫迷捧場；成功嘅角色係永遠嘅搖錢樹，HT又點會錯過將Thor變身12吋Figure呢？

製作Marvel英雄人物，既要得到演員及電影公司審批，加上保密關係，上畫前嘅參考資料少之又少，因此首辦往往要喺落畫後先面世，何解今次Thor竟然反傳統呢？HT解畫說︰「男主角Chris Hemsworth未算係一線演員，所以頭雕好快就過到審批，加上Thor嘅戲服唔算複雜，製作上慳番唔少時間。」雖然演員人氣一般，但HT依然請嚟大師GOX（Eom Jea Sung）炮製頭雕，配合J.C.Hong塗裝，基本上五官、輪廓、膚色都似足真人，唯一問題係為咗遷就戴頭盔，頭髮由兩塊部件組成，接駁位現形避無可避。

落足料合金鐵錘

漫畫版Thor一身維京人造型，懷舊味太濃，未必個個受落，電影版就變得時尚化，例如頭盔兩旁嘅裝飾，就由漫畫版嘅白色羽毛，電影版變成金屬飛翼，緊身背心變盔甲等，Figure就以PVC膠料交代，唔算特別，亮點反而係狼人Body外嘅緊身戰袍，原來用咗滴膠處理，令表面嘅格仔菱形紋理更加細緻。配件方面，Thor只有三對可換手掌，以及一把雷神之錘，不過重質不重量，鐵錘用合金鑄成，並非膠料加金屬色塗裝了事，誠意可嘉！

HT MMS146 1/6 Thor

零售價︰$1,080

預訂價︰$1,050

發售日期︰今年第2季

＊圖中為試辦款式，與正式推出的版本或有少許分別。

查詢︰2388 4677（玩具狂熱）