《G-Gen World》跨代機體Break爆亂入

Bandai Namco Games旗下著名戰略模擬遊戲《SD高達G世代》系列（簡稱G-Gen），可以一次過玩晒歷年嚟所有高達故事同機體，既可享受開發機體嘅樂趣，又能組織屬於自己嘅最強艦隊，故一直深受Fans歡迎。响本月底將會推出最新一集《G-Gen World》，加入《高達UC》同《劇場版高達00》實屬意料之內，不過連《BB戰士三國傳》嘅機體都有份登場，就真係令人喜出望外！

延續上集《G-Gen Wars》嘅遊戲玩法，《G-Gen World》會跟住原著故事逐個系列挑戰，以傳統過關推進嘅方式，保留系列作最耐玩嘅登場人物同機體收集，不過今集就強化版圖難度，將「Wars Break」昇華至「Generation Break」，誓必連場混戰。

G Break戰役 挑戰難度

上集好評如潮嘅「Wars Break」系統於今集進一步強化，新系統叫做「Generation Break」，並且將成功發動時所需嘅「Challenge Mission」難度提高，等大家認真鑽研關卡嘅戰略技巧。例如當大家玩緊《機動戰士高達》故事劇情時，只要滿足預設嘅「Challenge Mission」條件，畫面便會有「Secret出現」字樣，呢個時候會有其他作品嘅機體、人物連同劇情跨時空亂入，以強敵突擊或者同伴幫拖形式登場，形勢隨時逆轉，令戰事變得白熱化，呢種穿插假想和歷史情節嘅設計，令故事更富趣味。

宇宙世界 玩埋三國

今集嘅主模式唔再似舊有《G-Gen》系列嘅逐個故事單一路線攻略，今次嘅「World Tour」模式會於一張宇宙地圖上展開，大家可以游走各式高達作品嘅場景據點，去挑戰同根據點有關嘅故事關卡。隨住大家不斷攻城掠地，地圖上會繼續衍生出新據點，大家就可以從中任意挑選關卡玩，彈性更大。另外，今集除咗新加入《高達UC》及《劇場版高達00》外，就連PS3遊戲《高達戰記》同埋模型大熱嘅《BB戰士三國傳》都有得玩，遊戲中劉備高達大戰獨角獸高達嘅Mission Impossible情節將會一一發生！

自創角色 練功升呢

《G-Gen》系列一直都有原創人物畀大家修煉升呢，新一集唔只原創人物可以練功，就連自己創作嘅角色都可以整嚟用！今次收錄嘅「My Character」功能，能夠登錄最多10位自創人物，由角色姓名、性別、軍服、戰鬥音樂到成長類型都有得Set，玩得分外投入。兼且今集故事人物都可以靠「Ability Customize」功能，以點數購買技能，每人最多可以裝備5項技能，咁就能自設最理想嘅組合，作戰能力更勝一籌！

遊戲檔案

名稱：《SD Gundam G Generation World》

平台：PSP、Wii

類型：戰略模擬

人數：1人

開發：Bandai Namco Games

日期：2月24日

售價：約$520

查詢：2418 8896