食啖飯 樂瞳開心指數飆升

「食咗飯未呀?」呢一碗飯唔止填肚,仲可以成為Comfort Food,令人心情大好。歌手樂瞳(Cilla)雖然平日食得清淡,少食澱粉質,都一樣難敵米飯滋味:魚生飯、滑蛋豬扒飯,每每係辛勞工作後的獎勵,食一啖,即時充滿正能量。

娛樂圈有傳聞話,女藝人普遍唔嗅米氣,以保持最Fit身形;Cilla亦嚴守這「飲食規條」,每餐清清淡淡:蒸魚、烚菜,就連食飯都只限幾啖,相當忍得口。

難忘台灣豬扒飯

不過,偶爾為獎勵自己,Cilla都會在辛勞工作後大啖食飯:「第一次出碟時,要去台灣5日拍攝歌曲MV。台灣出名多嘢食,人人都開心食,淨係得我要戒口,都幾慘,哈哈。」忍耐4日後,趁最後一日有假放,同事們就帶Cilla去一間吉列專門店開餐,結果她勁食一大碟吉列豬扒飯,相當盡情,成為她至今最難忘的一餐飯。

Cilla自言愛濃味食物,像吉列豬扒這種炸物,便相當啱口味,若然有埋最愛的雞蛋,組成滑蛋豬扒飯,吸引力更會倍增。對比油膩的豬扒,Cilla亦愛較清淡的壽司刺身,其中色彩繽紛的魚生飯,這女生睇見就想食,除了對蝦、蟹敏感,以及不食海膽外,其餘都會放入口。

日本米最得歡心

食得多,大概真的會變專家,這大澳原居民最愛的一道鹹魚雞粒炒飯,米飯粒粒分明,那種爽口的感覺叫人愉快;其次要數珍珠米,雖然質感黏黏,但食落軟綿又煙韌,而最怕就是食稀飯:「我唔鍾意食粥,覺得味道好寡,通常病咗先會食,所以,如果啲飯太濕,似糊仔咁,就會唔想食。」

香港日本餐廳眾多,Cilla要食靚飯非常容易,像帝苑酒店內的稻菊日本料理,採用著名的山形縣女王米,上枱即聞到陣陣米香,而且米飯黏黏的很煙韌,還帶點甜味,配襯魚生、海膽、炸豬扒及炸雜菜蝦餅等,均非常出色。至於想食出色的意大利飯,餐廳Sabatini便非常不俗,大廚既選用魚子醬、牛肝菌,還配合檸檬皮、雞湯等同煮,滋味與別不同。

營養師:食糙米令人更開心

Comfort Food,愈來愈多人認識的詞彙,會讓人食得舒服的,到底是甚麼食物?據尚營坊健康顧問高級營養師黃凱詩(Cynthia)表示,Comfort Food可理解為會令人情緒、精神得以提升的食物。若從兩個層面解釋,第一是跟個人感覺及經歷有關,沒法用科學解釋;第二是有助製造大腦傳遞物,像血清素、正腎上腺素等,如蘊含色胺酸、複合碳水化合物、維他命B6及Omega 3等營養素的食物。Cynthia指出,不是每種碳水化合物都可歸納為Comfort Food,只有複合碳水化合物才算,例子包括麥皮、糙米、蔬菜及豆類等,而像白飯、白麵包及餅乾等一類的精製食物,效果便不太好。如真的想食得健康,她建議可在煮白飯時加入糙米,兩者比例約為2:1,讓身體慢慢適應。

第二最愛朝早狂食包

愛食飯的Cilla,其實還有另一至愛─麵包,因方便又好味,瘋狂程度可謂不相伯仲。據她身邊同事透露,Cilla只要是麵包都愛食,像每次去旅行,便特別期待每朝的早餐自助餐,因可試勻所有麵包:牛角包、方包、丹麥包等,就連鬆餅、蛋糕都唔放過,女生的食量果然富彈性。

查詢:(a)2733 2933、 (b)2733 2000

P.Yeung

雜錦魚生飯 $480(a)
魚生分量多得鋪滿整碗飯,色彩繽紛,睇見就開心。時令刺身包括拖羅、三文魚、左口魚、深海池魚、帶子及甜蝦等,連同飯味濃、煙韌的山形女王米品嘗,鮮甜無比。

食啖飯

炸豬扒蛋飯 $180(a)
以麥豬的豬背入饌,入口甜甜的卻不油膩,炸起來非常乾身,用上洋葱、雞蛋、味醂及鰹魚湯底炮製汁醬,拌飯一流。

炸雜菜蝦餅飯$130(a)
這裏的天婦羅最出名,以蝦、玉葱、南瓜、蘆筍等炮製的蝦餅,鬆化惹味,真的可以食完一大碗。

Porcini Risotto$288(b)
牛肝菌味道濃郁,混和洋葱碎、白酒、雞湯、牛油及芝士等,口感Al Dente而惹味,很值得品嘗。

Carnaroli Risotto Scented with Amalfi Lemon, Creme Fraiche and Oscietra Caviar $358(b)
面層有矜貴的魚子醬,為辟除那少許腥味,大廚特別以檸檬皮入饌,味道很清新,即使大啖食都不覺膩滯。

海膽飯 $600(a)
堪稱「全城最勁」海膽飯,來自北海道的馬糞海膽,色澤金黃,細細瓣特別甜,跟飯拌勻一齊放入口,好味得要大嗌Oishii!

食糙米會開心啲!
在穩定情緒上,不同種類的米各有不同功效,例如屬短米類別的日本米,容易令血糖急速上升,像印度米一類的長米,進食後血糖會較為穩定。

印度米。