上網開車房　自製香港Q Car

汽車遊戲唔一定要鬥快，Facebook最近就有一個新遊戲《Car Town》，實行創意行先，玩家先要開車房，再努力賺取金錢及經驗值，就可打造心水Q Car，有本地玩家仲以本土元素為題，創造出大家見慣見熟嘅雪糕車、郵政車及警車，包你玩上癮！

正所謂一分耕耘、一分收穫，玩《Car Town》都唔例外。遊戲一開始，就有三款基本車款畀你揀，當然性能只係入門級，玩家要透過經營汽車維修店，幫人洗車、換偈油及輪胎等，以及同其他玩家賽車，從中贏取金錢及經驗值，跟住就可以擴張維修店規模，賺更多錢；事事錢字當頭，無非為咗幫部車升級、換Parts，甚至到商店購買心水Dream Car。

上載圖片變Own Car

遊戲吸引之處，除咗畀你收集到唔同嘅車款外，最過癮係可以Upload自選圖片變成車身拉花，打造出獨一無二嘅Own Car，嗰份滿足感，唔會比玩《GT5》或者《頭文字D》遜色，而且仲可以安排部Own Car參加車展鬥靚，有機會贏多筆獎金。

咁多車款之中，似乎遊戲製作者對Prius情有獨鍾，開設咗一個Prius Zone，內有四款唔同嘅Prius Q版環保車，包括第三代Prius，以及最新嘅Prius V、Prius C，以及Prius Plug-in Hybrid，玩家仲可以透過「Prius Money Tree」獲得金錢，咁講法，玩家想唔揀Prius都唔得啦！