《戰國無雙3Z》劈友靚過Wii

自從Koei同Tecmo合併成Tecmo Koei Games之後，公司業績大不如前，為咗重振公司業務，佢哋先後推出多款熱賣嘅《無雙》系列名作，先係《高達無雙3》，嚟緊仲有《真三國無雙6》同埋《Troy無雙》。今個月就有整合版《戰國無雙3Z》，實現PS3高清畫質劈友之餘，亦加入新角色及各種新元素，靚過之前嘅Wii版多多聲。

咁玩開Wii版《戰國3》嘅朋友又點算好呢？唔使愁，事關遊戲開發商亦會推出加入新角色及新元素嘅追加碟《猛將傳》，對應Wii平台，仲唔使用原本隻《戰國3》碟打底都可以玩到，不過要玩齊所有元素嘅話，就要買《戰國3》喇！

新舊武將 都有古仔

《戰國無雙3Z》最耐玩嘅必定係記述各武將事迹嘅「無雙演武」，戰爭舞台分為戰國前期、後期同天下人三個組合，不過唔同嘅係，今集全部40位武將都有自己嘅無雙古仔，唔淨係得2P時先可以用到，投入度同耐玩度即時大增；而且今集仲加入咗三位全新武將，分別係明智光秀之女加拉莎、太閤秀吉嘅子弟兵福島正則，以及上杉謙信家姐綾御前，各自有唔同嘅攻擊模式。另外，新增埋「第二稀有武器」換裝，一位武將淨係升呢同拎兩把稀有武器，都已經夠襟玩啦！

挑戰模式 遇強愈強

至於芸芸追加元素中，對於玩慣玩熟嘅《無雙》玩家嚟講，屬地獄級嘅「挑戰模式」就最啱佢哋胃口。今集嘅「挑戰模式」會分成三種玩法：「劍豪」就係畀大家於指定關卡不斷擊倒無限復活嘅敵人，而且殺敵愈多，敵人愈勁，直至時間結束或者角色冇血為止；「踏破」就係鬥快登上三層高嘅城堡，當中會因路線嘅選擇而有唔同難度；最後嘅「飛沫」就係响船上限時不斷將敵人打落水攞分，而且「挑戰模式」所得成績更可以擺上網同其他玩家比較一番添。

自選武將 開創歷史

想開創自己專屬嘅歷史故事，就唔好錯過當中嘅「創史演武」模式。大家可以自由選擇心水武將嚟開展故事，從「武力」、「知力」、「財力」三者揀選自己嘅「人生目標」，跟住透過挑戰自動生成嘅關卡，推進劇情。戰鬥中會隨機執到整裝備嘅素材及金錢，而且完成戰鬥所得嘅功勳亦能夠兌換成金錢，大家就可以去雜貨屋買道具同僱用武將增強勢力，實現大計，最重要嘅係玩完「創史演武」時所得嘅素材道具更會繼承到「無雙演武」，鍾意儲嘢嘅玩家就最啱！

遊戲檔案

名稱：《戰國無雙3Z》

類型：動作

平台：PS3

人數：1-2人

開發：Tecmo Koei

日期：剛推出

售價：約$600

名稱：《戰國無雙3 猛將傳》

類型：動作

平台：Wii

人數：1-2人

開發：Tecmo Koei

日期：剛推出

售價：約$369

查詢：2710 8825