洪天明 百打不厭氣槍迷

喜歡追尋刺激的人士，相信一定喜歡用氣槍打War Game，藝人洪天明正是氣槍狂熱分子，他表示，最喜歡打War Game時衝鋒陷陣的感覺，可以如拍戲一樣「碌嚟碌去」，高峰期一星期打3、4次；他更坦言有段時間跟友人在俗稱「氣槍街」的商場中日夜流連，關注有否新產品，猶如返工一樣！

洪天明表示，近一、兩年才開始真正沉迷於玩氣槍及電動槍，不時約埋三五知己打War Game，高峰時期一星期打3、4日也百打不厭，他說：「開始時我都跟普遍新玩家一樣，打唔打得都唔緊要，最緊要『型』嘛！至於啲Gear則愈買愈多，Protection用嘅衫或Pad，例如飛虎裝、電腦迷彩等，成套買先至型，我仲同朋友試過响『氣槍街』由早逛到晚，食完飯又逛過，唔知以為我哋响嗰度返工呀！」

裝備充足 安全第一

天明又表示，玩氣槍時最緊要是安全第一，他自爆曾試過射傷一名玩家，他說：「雖然話咗唔好射頭，但有時真係自然反應，對方一伸個頭出嚟就射到佢；嗰次對方又冇戴保護面罩等裝備，結果射到佢流晒鼻血，不過我哋唔會將啲氣槍改裝得太勁，都只係同朋友玩吓，費事打到傷晒。」

初階變高階 愈買愈迷

談到給新氣槍玩家的建議，天明認為，任何情況下都要以安全行先，而第一支氣槍則不用買太貴的型號，可以熟習了玩法後才向高階發展，至於天明的第一支氣槍是哪種？「我第一支買嘅係好多部隊都用緊嘅Glock 17，呢次拍戲都成日揸住同見到，之後玩耐啲就買咗支高階啲嘅氣槍，係日本品牌MARUI嘅HI-CAPA型號，之後仲買埋中型氣槍同長型氣槍，愈買愈沉迷呀！」他說。

氣槍實用射擊講求快而準

Clarence Lai（阿翔）曾擔任警匪電影槍械顧問，亦對設計及改裝槍械零件相當熟悉，故他於90年代從日本引入現時世界各地也熱爆的氣槍IPSC（氣槍實用射擊）運動。他坦言，不論普及程度還是技術，香港的玩家於氣槍IPSC中的成績也算是世界上首屈一指的，他又簡介了還未廣為港人所熟悉的氣槍IPSC：「其實氣槍IPSC跟War Game係完全兩回事，氣槍IPSC要喺最安全、最快、最準嘅情況下擊倒所有標靶，完全係取決於個人技術；至於War Game就係較團體嘅運動，入面有好多戰爭技巧，亦可滿足到好多男性嘅爭勝心。」

結構穩定零件多

阿翔亦為初踏入氣槍、電動槍大門的新手，介紹多款入門氣槍：「新玩家可以嘗試日本品牌MARUI，佢哋嘅機械結構較穩定，仲有好多零件較易買到，其中HI-CAPA型號更加係大熱之選；長氣槍方面，最多人揀最TOP嘅係SYSTEMA嘅M16款，準繩度非常之高，而香港品牌AIRSOFT、G&P，以及台灣品牌KJ、WE都係平靚正之選！至於零件方面，外國新品牌DARK INDUSTRIES有好多特別Parts供大家選擇。」