EB-1775W 44mm激薄

雖然薄永遠都係科技產品嘅賣點，但並不是所有產品薄得嚟都有用，好似普通家用投影機，薄唔薄其實未必咁緊要，但係將薄身設計放到便攜式的商用投影機上就非常有用了。Epson新推出的EB-1775W就係目前全球最薄嘅3LCD投影機，機身厚度僅得44mm，比一張信用卡還要矮，加上重量僅1.7kg，拎出街使用自然方便得多！

由於3LCD投影機設計所限，內置了三組棱鏡來區分紅、綠、藍三原色，組件佔用唔少空間，所以較難造出跟DLP機種相同嘅薄身設計，因此EB-1775W可以做到咁細部真係相當難得。

A4大小 放入手提袋

小記首次喺日本Epson總部見過呢部全球最薄3LCD投影機，當時只見女職員施施然從手袋抽出EB-1775W，再單手提起，完全唔覺有任何難度，一改以往大家覺得3LCD投影機又重又大部嘅觀感。EB-1775W機身厚度僅得44mm，平放時面積跟一張A4紙相差不多，而且重量亦得1.7kg，拍得住一部11.6吋Notebook；事實上，Epson更宣稱可以將EB-1775W跟手提電腦一齊放入電腦袋外帶使用。

高速校正 毋須冷機

跟家用投射機可以預早校定擺位唔同，便攜式商用投影機的設定分分鐘難倒唔少用家，可能每次使用時都要花上好一段時間才能設定妥當。呢個時候EB-1775W新增嘅Screen Fit功能就非常幫到手，只要一按機身上的專屬按鈕，投影機就會投射出一個「田」字圖案，將畫面正確投射在屏幕上，再按Screen Fit鍵，約兩秒左右就能自動調正畫面，比以往要左校右校實在方便得多。此外，EB-1775W啟動同關機時間都比同類產品快，毋須特別「冷機時間」都可即時關機。

無線傳輸 介面充足

機身設計方面，EB-1775W都作出唔少貼心嘅改動，其一是機身採用短投鏡頭，只需短至1.35米距離就可投影出60吋畫面，這樣投影機便可以安放在會議枱前方；另一方面EB-1775W嘅散熱位都同樣地放置在機前，操作時所釋放嘅熱氣會向前排放，唔怕影響坐在前排的觀眾。EB-1775W還有着3,000流明的超高投影亮度，喺開住燈嘅會議室內，都一樣可以投射出清晰影像。接駁介面都算得上齊全，由D-Sub、USB到HDMI都有，接駁各類訊源都很方便，除咗做Presentation外，還可以接駁影音器材播片；另外機身內置無線網絡功能，可簡易地接上電腦及其他影音設備。

查詢：2827 8711