iPhone電子寵物陪你玩

時下唔少年輕人怕寂寞，都想養番隻寵物陪吓自己，但有時寵物太黐身，想外出旅行都唔知要搵邊個幫手照顧。怕麻煩？依家iPhone就有各種唔同嘅電子寵物Apps，咁隨時都可以有伴陪你玩！

講起電子寵物Apps，大家可能只會諗起貓貓狗狗，但iPhone上就有各式各樣嘅寵物畀大家揀，就連較偏門嘅青蛙都有，而且有啲仲可以同朋友連線互動，交流同分享飼養電子寵物嘅心得，真係幾好玩o架！

互動性高iPet Pets

想應節養兔仔？iPet Pets入面就有可愛嘅賓尼兔畀大家揀，而且仲有企鵝、熊貓同長頸鹿等動物任你養，真係有錢都未必養得到。程式最大賣點係佢嘅互動性夠高，大家可以透過「Pet World」選項，觀摩其他玩家嘅寵物情況，仲可以同隻寵物玩或者同佢嘅主人聊天，咁就唔怕悶啦！

售價：免費

Pets Next Door備有中文介面，名為《鄰家寵物》，主要功能就係畀已經有寵物嘅朋友作為交流平台，而且可以加入或建立一個群組作留言版。此外，大家可透過「寵物世界」選項，找尋四周同樣擁有此Apps嘅用家，仲會分類為貓、狗及其他組別，絕對唔會睇到眼花。

售價：免費

相信大家都有睇過或聽過《寵物小精靈》呢套卡通片，Pets Live亦包含咗呢種遊戲元素，裏面嘅寵物各有特色、屬性同技能，而且由Level 1慢慢開始育成，經過唔同嘅訓練同任務，可以學習更高等級嘅招式，及後更可增加寵物數目；加埋網上對戰功能，真係夠晒刺激！

售價：免費

除咗貓貓狗狗外，養魚都係好多朋友嘅興趣，見到個魚缸五彩繽紛，又真係幾心曠神怡。Tap Fish可以飼養嘅海洋魚類品種甚多，由小小嘅珊瑚魚到鯊魚或殺人鯨都有，仲可以加入海藻、珊瑚同各式背景，要整番個屬於自己嘅「海洋奇觀」就話咁易！

售價：免費

寵物之中，養青蛙可以話係較另類嘅選擇，你都想試吓？咁Pocket Frogs可能係大家心水之選。當中備有多種色彩同花紋嘅青蛙，透過帶佢出池塘食蜻蜓嚟提高快樂度同充飢，成長後更可以拎嚟交配出更多品種同顏色，如果儲齊同一品種嘅所有顏色仲會得到獎勵添！

售價：免費

唔知大家仲記唔記得大熱一時嘅《任天狗》遊戲呢？大家可以同佢玩、餵嘢畀佢食、甚至帶佢出街散步，真係同養隻真嘅寵物差不多。Touch Pets Cats勝在一次有多個品種可以揀，而且可以透過Facebook同Twitter等社交平台搵朋友同你一齊玩。

售價：免費

Boris