《戰場女武神3》作戰狀態全身發白

日系SEGA動作戰爭遊戲名作《戰場女武神》系列，唔經唔覺已經有四、五年歷史。第二集已由PS3轉戰PSP平台，遊戲以虛構嘅歐洲大陸戰爭史作背景，布局細膩，令相關嘅動漫作品大受歡迎！至於新推出嘅第三集，平台依然係PSP，以唔同角度再度重現「加力亞戰史」嘅悲壯故事，大家又點可以錯過呢！

今次《戰場女武神3》可以話係第一集嘅外傳故事，依然係以歷史主線「加力亞公國」做視點，繼續利用咗混合了戰棋部署同動作成分兩大元素而大受歡迎嘅「BLiTZ」戰鬥系統，更將第一集嘅激盪故事延伸到PSP上。

國難當前 奮力一戰

今集依舊以征曆1935年架空歐洲大陸做背景，主角隊伍隸屬位處聯邦同帝國兩軍之間嘅小國─主張中立嘅「加力亞公國」，不過就唔係義勇軍，而係一班集結咗罪犯、逃兵同戰鬥狂等劣等成員組成嘅「422部隊」，負責做陣前爛頭蟀。主角士官長克爾特．歐文原本備受期待，但係畀壞人出賣後被調任「422部隊」，隊中遇上擁有女戰神之力嘅古海洋族女主角莉耶拉．馬爾賽利斯，面對帝國軍入侵，國難當前，男女主角決定企出嚟，重新帶領「422部隊」，為回復民眾嘅尊嚴，展開艱苦旅程。

地圖推展 營地管理

故事嘅推進就十足正統SLG遊戲，章節開始時會有劇情介紹與軍勢概略，跟住就會進入「進軍地圖」揀選戰場，當然所選擇嘅路線會對往後劇情產生分枝。戰鬥隊伍最多有9人，以戰棋式部署，大家睇地圖落指令，進入戰鬥後就要親身操控角色動作，兩者交替進行。

戰事完結就會到達「無名者營區」，大家可以進行物資調達、兵種訓練、軍備購買及強化，今集更可以幫隊員切換兵種，迎合需要。當然不斷以單一兵種作戰會累積「熟練度」，從而轉職到上級兵種，打仗就更能輕鬆取勝！

特殊潛力 打孖爆Seed

今集亦有兩個新增元素，令人物戰略地位更突出。第一樣就係男女主角嘅固有技能「特殊化」，隊長克爾特擁有「直接指揮」呢樣帶住同伴共同作戰嘅能力，發動時會有兩位同伴唔扣血作援助射擊，攻擊力大增；莉耶拉嘅特技就係「女武神」，發動時全身變白兼進入短暫無敵狀態，遇神殺神！至於其他隊員嘅能力，就要用「Master Table」育成各自嘅「潛在能力」，不過能力有好有壞，修煉前最好Check清楚，以免搞垮戰事喇！

遊戲檔案

名稱：《戰場女武神3》

類型：SLG+動作

平台：PSP

人數：1人

開　　發：SEGA

推出日期：已推出

售　　價：$529

查詢：2710 8825