Z系名機重炮　MG ReZEL Commander Type

睇過《機動戰士高達UC》第一、二集嘅高達迷，相信都會認同除咗獨角獸高達、新安洲及剎帝那呢三款屈機級MS外，最好打嘅都算係聯邦軍嘅里歇爾（ReZEL），起碼唔似積根一出場就畀人擊落，又識變形高速突襲。呢款《UC》名機喺去年已經出咗「一般機」嘅MG 1/100模型，係人都估到「隊長機」一定會食住上，Bandai果然冇令人跌眼鏡，ReZEL Commander Type已經有型上架。

正如引言提到，隸屬聯邦軍隆巴納部隊嘅里歇爾，喺《UC》故事初段已經現身，對付「帶袖的」卒仔機居禮祖魯綽綽有餘，點知遇到新安洲就冇得鬥，再加埋有浮游炮嘅剎帝那，連隊長機都畀佢擊落。不過高達迷對呢款藍色MS依然相當支持，除咗明白到對手太強、非戰之罪，更大原因係佢嘅變形系統勾起粉絲唔少情意結。

大大隻做隊長

里歇爾嘅開發概念源自於Z高達量產計劃，變形機關放棄成本高昂嘅Re-GZ靈格斯，改用奧干嘅密達斯，資深粉絲見到里歇爾，自然聯想到密達斯呢款橫跨Z及ZZ時代嘅名機。今次嘅MG版唔使換件就做到完全變形，想變Wave Rider形態，就先將頭部縮入上半身，再整個揭上，然後鎖緊四肢關節，將手臂收納，張開腿部就完成。至於隊長機同一般機嘅最大分別，就係背部嘅安定翼參照百式設計，體積大好多，佢支專用炮亦比一般機嘅激光槍大支，火力自然更強。

企唔穩要買Stand

至於MS形態，里歇爾體格比例較魁梧，為預留空間收納手臂，所以上半身比較橫，如果將MG獨角獸未爆甲形態放埋一齊，獨角獸當堂細咗一個碼。至於機體透明件顏色唔同一般機，眼罩、肩甲同膊頭感應器由紅轉綠，仲Show到裏面機械感十足嘅Detail位。講到可動性，手臂關節夠實淨，而且考慮到支炮變大咗、重咗，於是喺背部加設接駁位，舉高支炮都唔會「條條Fing」，不過為咗遷就腳部嘅變形設計，股關節伸展度有限，而且腳掌接地麻麻，買得MG里歇爾，睇怕都要入埋高達系列嘅Display Stand。

Delta Plus做候任MG？

《UC》故事有好多MS，不過目前都只係得獨角獸、新安洲及里歇爾MG化，相信大家都好想之前推出過HGUC版嘅Delta Plus及剎帝那，可以加入埋MG系列，筆者認為Delta Plus嘅成數較高，事關機身組件大部分可以利用MG版百式做修改，而且變形機關又可以參照HGUC版同埋MG里歇爾，比起剎帝那乾手淨腳得多。而且剎帝那咁大部、設計又複雜，如果MG化嘅話，分分鐘賣逾$1,000，呢條數睇怕Bandai都有排計。

查詢：2733 1828（瑞華行）