Chat Room

飲食版記者Angelamamy

一直都有台灣癮，鍾意台劇、台星、台食，甚至連家裏也特別裝上東森衞視台，為的就是要時刻緊貼台灣時事新聞，絕對是個忠實寶島粉絲。最近荃灣新開了一家來自士林夜市的炸雞排專門店，當然即時幫襯，看看風味如何。$25一大塊，炸得香脆鬆化，雞肉出奇地沒有雪味，調味料與當地的很相近，食完只有少許口渴，合格有餘啦！

飲食版記者金枝

多謝香港W酒店公關Suky姐姐的邀請，上星期到酒店的中菜廳一試其賀年菜式。W酒店一向走西式型格路線，去年開設中菜已令人驚訝，但坊間亦有人認為好睇但唔算好食，而我的評價則是「大有進步」。記得餐廳剛開業，食物的味道確實不夠凸出，但上星期晚宴裏的一道炸蟹鉗，蟹肉打得夠彈牙，面層加咗香脆幼絲，靚得交關，食落口感脆卜卜都幾Q！只是脆絲教人吃得有點狼狽，咬一啖就成枱都係，早知叫侍應哥哥留番對刀叉畀我啦>.<"

飲食版記者晴

早前「牛角1號」開張時，小妹有幸負責做採訪，有機會試到呢間喺日本擁有六百幾間分店、口碑極佳的日式燒肉專門店，由前菜到主食到甜品都說不出咁正，試過之後一直念念不忘。之前一直無機會再去，因為真係太多人排隊，試過打電話去Book位，卻已經排到4月。幸得好心人幫助，前禮拜才有機會帶媽媽去試，再次食到好喜歡的上級牛肋肉、鹽醬豬頸肉同銅鑼燒，真係好感動！聽聞尖沙咀LCX 2號店已經開幕，希望可以分散人流，容易啲等到位啦！