Prosumer DC 輕裝上陣影煙花

依家香港一年都會放幾次煙花，但當中以今晚大年初二嘅煙花匯演，歷史最悠久兼最受歡迎，預料今年有逾28萬人前往維港兩岸睇煙花，不少龍友已帶齊裝備，霸個靚位影相！不過影煙花都唔一定要咁大陣仗嘅，其實只要有部半專業級DC（Prosumer DC）再加些少拍攝技巧，人人都可以輕裝上陣拍攝靚靚煙花。

講開影煙花，大家可能會有個錯覺，以為一定要用DSLR先做到？非也，現時好多品牌嘅Prosumer DC都可以調校光圈快門，又可以加外置閃光燈，配合高級嘅防震系統同埋專用嘅鏡頭配件，已經有大機嘅七、八成功力，機身仲要夠輕巧，喺人多擠迫嘅地方影相，真係掂！

器材篇

HDR高動態拍攝

加入咗HS System嘅G12，最高感光度可達ISO 12800，配合埋28mm廣角鏡頭，拍攝煙花可以話係如虎添翼。至於夜間人像方面，G12仲新增咗HDR高動態範圍模式同埋備有2.8吋扭芒，方便情侶揸機自拍之餘，仲會連拍三張唔同曝光值嘅相片再合而為一，提升影像層次感。

像素：1,000萬 屏幕：2.8吋

焦距：28-140mm 短片：720p

24mm廣角影風景

擁有大光圈一直係Panasonic LX系列嘅一大賣點，LX5便備有F2.0大光圈，而且選用Leica鏡頭，廣角端達24mm，最啱鍾意影風景嘅朋友。加上LX5強化了防震系統，選用新一代Power O.I.S.技術，以及GF2都採用嘅Venus Engine FHD影像處理器，令佢可以拍攝到較慳位嘅AVCHD Lite 720p高清影片，於ISO 12800下，拍攝像素仍可維持在300萬。

像素：1,010萬 屏幕：3吋

焦距：24-90mm 短片：720p

焦距夠闊易操控

Nikon P7000喺拍攝焦距方面比較出色，由28mm廣角至200mm遠攝都可以兼顧得到，而且內置VR II防震技術，以及多達5個機身轉盤，設計布局分明。此外，P7000的感光度達ISO 12800與G12睇齊，並支援旗下DSLR的AF-F全時間對焦系列，拍攝720p高清影片時需要追焦也不成問題。

像素：1,010萬 屏幕：3吋

焦距：28-200mm 短片：720p

技巧篇

技巧一：兩用雲台 唔怕手震

無論影夜景定煙花，雲台同腳架一定唔少得，當中以Manfrotto MK394-H最為輕巧實用，備有一條超長嘅操控桿，用嚟控制雲台上下郁動，加埋三維式設計，拍攝時可鎖緊及固定機身，影像自然更穩定，唔會鬆郁矇，而且連DV機都啱用！

技巧二：煙花模式 按掣即影

唔想花心機調校設定，但又想按個掣就影到靚相？其實好多相機都擁有煙花場景模式，揀選後相機就會醒目地選用慢快門，並推高一點ISO同埋閃光燈等設定，全程自動波，而且影出嚟嘅質素都幾唔錯o架！

技巧三：廣角接環 盡收靚景

萬一霸到中間靚位，但又影唔晒左右兩邊嘅煙花景，真係好浪費。其實呢類Prosumer DC均會推出專用拍攝配件，魚眼、廣角同遠攝等應有盡有，加埋百搭嘅鏡頭筒，售價約二千元左右，比起買鏡頭抵玩好多。要影廣角效果，真係Easy Job啦！

技巧四：外置閃燈 趕走燶面

大家可能都想同煙花「合照」，但係煙花咁光，影相時好容易造成背光，搞到主角面燶燶。想靚人同美景同時兼顧？可利用外置閃光燈為人像補光，又可保留盛放既煙花背景，真係一舉兩得！

查詢：（a）3191 2333　（b）2833 0955　（c）2907 1122　（d）2327 6728　（e）2926 2300

維港兩岸睇煙花熱點

港島區中環IFC

今年中環IFC喺初二晚更會開放3樓及4樓平台畀市民欣賞煙花，夠高又開揚！

太平山頂

想再高啲？唔知太平山頂又滿唔滿足到閣下嘅要求呢？影煙花之餘，仲送埋夜景。

九龍區 海港城

海港城今年會開放天台停車場畀市民入內拍攝，只要今日喺商場消費滿$800或以上（以兩張即日發票計算），再捐$20畀「聯合國兒童基金香港委員會」，即可獲贈兩張入場券！

尖沙咀海旁

尖沙咀海旁係九龍區睇煙花嘅勝地，海濱走廊對出四周圍都冇建築物阻礙視線，地方可以容納過千人，就算用埋腳架影都冇問題。

兔年趣怪煙花咪眨眼

恭喜發財

恭喜發財係新年大家必講嘅賀年語句，今次兔年打頭陣嘅煙花亦以此命名，而且發放時會出現一個個紅色「8字帶金絲柳環」，加埋《恭喜發財》歌曲做襯托，勁有氣氛！

金兔迎春

為迎接兔年，今年煙花第二彈便會發放8隻活潑可愛嘅「小兔臉」，帶出金兔迎春的意思，配合埋《繼續微笑》歌曲，之後高空會出現「2011」字樣，祝願大家笑口常開。

愛在香港

香港係一個多姿多彩嘅社會，所以呢一幕《愛在香港》包羅咗銀、金、紅、橙及黃色共5種色彩嘅煙花，加埋綻放出嘅「I『心』HK」字樣，又靚又窩心。