聖域雙雄變型咗
黃金12宮嘅射手座艾奧里斯（Aiolos），唔只係最富正義感、最受人景仰嘅角色，最近佢仲變型咗！事關聖衣神話胸像系列（Saint Cloth Myth Appendix）已經為艾奧里斯出咗升級組件，同步上架仲有「特別限定品」嘅教皇薛安（Sion）；面對呢兩位聖域嘅傳奇人物，星矢粉絲難免乖乖進貢利是錢。
羽毛翼好睇唔好郁
先講艾奧里斯嘅胸像組件，除咗做半身擺設外，仲可以代替原本嘅射手座上半身組件，「合體」成更有型嘅新Look，唔只面相細緻咗、聖衣貼身咗，最大改變係雙翼變成羽毛翼設計，比起原本嘅「硬繃繃」造型飄逸得多，羽毛之間亦富層次感，不過關節位唔及原裝咁多，而且翼根同背脊嘅連接位唔算夠力，雙翼難以長時間撐高。至於教皇薛安有黑、白兩件袍外，仲跟埋鍍金御座，面相亦有誠意，並非將冥衣白羊座嘅頭部組件照搬算數，頭髮由青色變成啡色外，雙眼亦係重新塗裝，唔似冥衣版「竇雞」，當堂靚仔晒。
查詢：2433 1828（瑞華行）
同原本嘅聖衣神話射手座合體，就擺到英氣十足嘅拉弓甫士。
胸像版面相比原裝有神氣得多，仲有兩款任換。
隨盒跟埋星矢面相，不過眼神「鬼鬼哋」，做唔番星矢嘅熱血Feel。
聖衣神話Appendix射手座艾奧里斯胸像建議零售價$310
隨盒跟埋黑袍之餘，仲有全黑色嘅面相組件，重現番原著嘅神秘Look。
聖衣神話特別限定品教皇薛安 建議零售價$370