得閒圍脖

飲食版記者師傅仔：

想身上有排朱古力？其實唔使苦練，搵手拎住就得喇！雖然唔係天王，但我呢排朱古力同樣會令粉絲尖叫，不過係朱古力粉絲啫。皆因這是意國名牌Amedei的出品，仲要係最頂級的Porcelana：只用Chuao一種可可豆製成，相當矜貴，每年更只能生產兩萬盒，我呢盒編號係9005，試過後覺得味道特別濃郁，而且回甘悠長，唔……果然厲害！

飲食版記者陳小皮：

呢款包，由我中學開始直到依家，食咗十幾年。講真，我諗唔到佢有幾特別，喺我眼中平平無奇、普通到極的一個包，估唔到同事們會將目光停留喺佢身上兼討論一番，七嘴八舌間，有人話：「有幾巴閉呀？好食極咪又係一個臘腸卷。」無錯，臘腸卷確實係唔吸引無特別，但呢個包最特別嘅地方，係佢唔係一條臘腸卷，而係一個腸仔包！白色的包身，內藏一條香腸，問你服未？

飲食版記者Josh：

無論掃街或者看着火鍋柯打紙，總會對着「獅子狗」發呆。它可是陪着我長大，也成為我跟80後嚴重斷層的最大關鍵食物！近來有一個與陌生朋友開開玩笑的小問題，從中即知道對方是哪個年代成長。這條問題百發百中，卻又不小心把自己露了底，這條問題是：「你細個睇過有忍者兩個字的卡通片是……」答案若是《忍者亂太郎》，恭喜！你大把青春；若是《忍者小靈精》，那吃多些獅子狗吧！畢竟你的歷練有番咁上下，經得起80後調侃的。