Ford Focus Electric睇場戲叉足電上路
為咗展現東道主嘅強勢，福特（Ford）喺今年北美車展嘅陣容認真大陣仗，除咗C-Max Energi、C-Max Hybrid及Vertrek Concept外，仲有廠方首款電動私家車作品Focus Electric，標榜環保之餘，更令人驚喜係充電時間快得很，三至四個鐘頭就搞掂，泊低部車，食個飯、睇場戲，又可以開車上路。
專用App預告等幾耐
據廠方表示，Focus Electric用咗Liquid-cooled/heated鋰電池組，配合240V插座充電，三至四個鐘就完成，快過晒現時大部分量產化嘅電動車。除此之外，車迷仲可以喺智能手機下載專用嘅充電App—MyFord Mobile，隨時隨地用手機監察充電情況，唔使車主估估吓。至於車上嘅Driver Information System識得根據尚餘電量，配合衞星導航，為駕駛者設計出最慳電嘅行車路線，並且Show埋最近嘅充電站位置，設計周到。
新車頭 設計過簡
廠方喺充電模式及相關配套上落墨甚多，不過有關Focus Electric嘅動力輸出尚未揭盅，只知極速可達136km/h，足夠應付一般市內行車需要。
造型方面，Focus Electric與汽油版大致相同，不過車頭變得更簡潔及未來化，整個鬼面罩簡化為電鍍橫框，就連霧燈都冇埋，頭燈就因應潮流加入LED燈眉，假如廠方落實喺2013年量產嘅話，會唔會加番少少裝飾呢？
除咗車速，儀錶板仲會顯示埋剩餘電量及其他系統選項。
中控台附設八吋輕觸式屏幕，整合行車狀態、電話、音響及衞星導航等多項功能。
透過MyFord Mobile，就可利用智能手機與車輛連結，監察充電情況。
車側同車尾，以至車廂布局都跟足汽油版，冇乜大改動。
可摺式後排配合揭背尾門，搬運大型行李都夠方便。
充電插頭位加入發光圓框，型過汽油版多多聲。