得閒圍脖

科技版記者貓科：

立體3D拍攝是攝錄界新潮流，小記都心癢癢想買部3D攝錄機來趁熱鬧Panasonic繼去年推出的首款3D攝錄機HCD-TM750/650後，近期又宣布會於2月25日推出第二代後繼機HDC-TM90，支援1,080/60p拍攝，放棄了上一代的3MOS感光元件，改用單MOS設計，令體積更為輕巧的骰，同時為提高拍攝靈活性，可支援28mm廣角及iA 40倍變焦拍攝，加上內置64GB記憶體，就算長時間拍攝都夠用，不用經常換卡，售價約100,000日圓（約HK$9,400）。

科技版記者Boris：

經過一輪趕工寫稿，過年前幾日終於都敵唔過流感，病鬼咗。真係應驗咗「得閒死時，唔得閒病」，做完嘢就立即生病，都唔知係好彩定唔好彩。不過，依家啲流感病毒真係好勁，搞到個人周身骨痛，仲要冇晒胃口，日日11點上床瞓足8個鐘都搞佢唔掂，最後都係死死地氣睇醫生。希望新一年大家都健健康康，咁先可以搵多啲賺多啲嘛！

科技版記者Alfred：

作為一位機迷，上星期尾發生嘅大事一定唔可能唔知。事關SCEJ大佬平井一夫終於向任天堂郁手，發表咗PSP嘅後繼機NGP（Next Generation Portable），而且計劃响今年聖誕節前後發售。老實講，小記等咗SONY出次世代PSP真係等到頸都長，不過對於新機唔能夠支援UMD碟就有啲失望喇。小記覺得一部主機賣唔賣得，最重要係睇相關平台推出嘅Game多唔多人買，例如Square Enix嘅《FF零式》要兩張UMD先至夠裝，如果冇晒UMD，咁部機嘅容量到底要幾多先夠？還是好似iPhone咁玩單撈？如果係咁，點解仲要專登買部NGP呢？