LEGO 44cm穿梭機步步高陞

今日年廿九，咁快就有利是收？冇呃你，係LEGO提早派利是，仲由即日起派到今個月15日，令你愈買愈抵、愈抵愈買。除咗送優惠，同步又點少得LEGO 2011年新品，有台柱星戰系列外，仲有結合埋Card Game及陀螺元素嘅旋風忍者系列（Ninjago）；而創意百變系列（Creator）更加應節，事關有高達44cm嘅穿梭機，帶佢返屋企，兔年仲唔步步高陞！

大人、細路都鍾意嘅LEGO，2011年首季新品已經抵港上架。或者大家一直當LEGO係靜態玩具，除咗Technic系列，其餘都係砌完擺喺度就算，不過Ninjago系列就令人改觀，事關唔同嘅忍者Figure係有對戰功能，仲要求玩家見招拆招。原來喺LEGO嘅忍者世界中，唔只有火忍、電忍、土忍及冰忍四大派，仲有佢哋嘅共同敵人骷髏兵團。對戰方法係先為人仔裝上武器，之後再放喺陀螺底盤上，以撞跌對方嘅武器為勝。想加強勝算？仲可以出屬性卡或必殺技卡，例如可以令己方雙手揸武器，或者迫使對手單腳企，變化多端。

忍者系列對戰陀陀擰

呢款入門套裝嘅主角係閃電大師阿光Jay，以及骷髏軍嘅武士尊爵魔Frakjaw，配件就有兩個陀螺底盤、六件武器、兩張人物卡、八張戰鬥卡以及LEGO磚，玩熟咗就可以收集埋其他Ninjago人仔啦！

除咗對戰，忍者系列亦有好多情景組合，包括呢款「冰龍進攻」，除咗有冰忍Zane同埋拍檔冰龍外，仲有骷髏閃電魔Krazi。

星戰系列人多勢眾

最大賣點係一對大機翼可以360°旋轉，展現出T-6獨特嘅巡航形態，駕駛艙就可以獨立分離，變成逃生艙。機關多多之餘，人仔款式亦好豐富，唔只有深入民心嘅Anakin Skywalker及Obi-Wan Kenobi，仲有Shaak Ti 及Saesee Tiin兩位絕地武士。

創意系列一飛沖天去

唔只夠高夠氣勢，構造仲好精密，事關組件多達1,204件，機艙可以打開，放出人造衞星，就連駕駛艙及引擎都砌埋，至於機外嘅一對火箭推進器，以及中間嘅大型燃料艙，都可以同穿梭機分開。人仔方面就有兩名太空人、一名地勤人員連工程車，以及基本嘅地面設施。

提早派利是

買LEGO，最新、最齊始終都係去玩具反斗城，依家仲大派利是！即日起至本月15日期間，凡到玩具反斗城購買2011年LEGO新品，每次$250或以上（單一發票計算），就有LEGO大利是一封，內藏$20、$50或$100等不同面值嘅優惠券，於本月16日至3月31日期間再到玩具反斗城選購LEGO，買滿指定金額就用得，詳情可到http://www.toysrus.com.hk/lego/LEGO-2011-Pre-Sale/chi-Coupon.htm瀏覽，記住呢封大利是數量有限、派完即止！

查詢：2262 7186