架生急召集 幫愛車扮靚
仲有兩日就係年廿八，除咗幫屋企大掃除，咪漏咗日日同你風雨同路嘅愛車。依家先醒起搵汽車美容店約時間？遲唔遲啲呀，睇怕已經Full Booking啦！就趁汽車用品店未收爐，拿拿聲齊「架生」，幫部車DIY洗白白啦，只要洗得其法，唔只快靚正，仲比幫襯美容店慳番唔少，剩番啲錢封多幾封利是好過啦！
就算你平時好少、甚至未洗過車都唔使慌，洗車，唔係洗樓，易好多o架！第一步就係工欲善其事，水桶、毛巾、洗車劑同基本車廂清潔用品等基本裝備必不可少，只要你巡一轉專賣汽車用品嘅店舖，例如旺角黑布街一帶，已經可以搵齊，Don't Worry！
地利篇 有水便成事
搵齊用具之後，就要夾「地利」，記住唔好貪方便隨街洗車，除咗會影響途人外，仲有可能畀人告阻街。如果泊開嘅停車場冇水喉等基本設施，甚至講明唔畀洗車，點算？此處不留人，自有留人處，其實唔少時租停車場都有水喉，揸入去泊番一、兩個鐘咪得囉；再唔係入開油嘅話，雖然油站範圍內唔可以停留洗車，不過可以揀附近有車位嘅油站，去油站載滿水，行幾步返泊位慢慢洗都得，自己執生，OK？
行動篇 記住Step by Step
搵啱地點之後，就要Take Action喇！不過洗車唔同洗地，唔可以就咁搵盆水照頭淋咁求其，要講先後次序，否則事倍功半之餘，仲可能會整花部車，唔想愛佢變成害佢，記住以下六個Step喇！
洗車Step
1.香港空氣質素差，灰塵特別多，所以大部分車嘅表面都會積滿塵粒。a喺洗車前記住先用雞毛掃掃塵，最好係順風向掃，以免吹返轉頭，咁就嘥心機捱眼瞓啦；
2.跟住用清水先淋濕車身，或者用濕布拭抹都得；
3.之後將汽車專用清潔劑開水，再用海綿搓勻車身表面；
4.再用清水沖洗，記住要沖乾淨，咪留漬呀；
5.用吸水布抹乾車身；
6.如果想打埋蠟嘅話，最好揀乾燥天氣，以及避免陽光直射，室內泊位就最適合。
汽車查詢：2511 2727（Motor Image）
落旺角黑布街打個轉，想搵乜嘢洗車用品都有。
搵啲附近有車位嘅油站，泊好車，再去油站攞水都得啫。
車頂塵多，長柄雞毛掃就幫到手。
用輪圈清潔噴劑，最好保持六吋距離，咁先有效又安全。
大銀幕沾滿灰塵同油漬，最好先用清水洗淨，之後先落玻璃水。