次世代PSP NGP 前後任捽

3DS一個月後就會推出，不過SCE搶閘喺兩日前出招，廣邀世界各地傳媒齊集東京參與「PlayStation Meeting 2011」，正式公布今年年底推出暫名為NGP（Next Generation Portable）嘅新一代手提遊戲機。NGP雖然冇3D屏幕，但勁在可塑性夠高，5吋屏幕跟機背都支援到Multi-Touch多點式操控，仲加埋六軸感應設計同新增嘅第二組Analog掣，要前捽後捽、左旋右轉甚至切換視點都易如反掌。

現場確實有展出Demo機，不過只限SCE跟各遊戲廠商高層上台示範時使用，傳媒最多只可以摸一摸部Mock up機，睇嚟要等到今年6月E3先有實機試玩啦！

多點觸控前後捽

NGP機身設計同之前部PSP-3000差唔多，但就換上一塊更大更靚嘅5吋OLED屏幕，從側面望一樣睇得清楚；不過特別在呢塊5吋屏幕支援Multi-Touch功能，甚至連機背部分都係另一塊Multi-Touch TouchPad，認真特別。現場就見到SCE高層用《Uncharted》試玩「前後捽」，前捽幫主角爬山、跨越障礙及揀選前進路線；後捽則可以爬繩，堅勁！到示範新開發遊戲《Little Deviants》時，更可以喺機背捽出高山，令主角順利碌到想去嘅地方，咁嘅玩法之前諗都未諗過！

六軸感應大玩VR

NGP特別在加入如PS3無線手掣般嘅六軸感應功能，第日玩射擊遊戲畀喪屍捉住時，就有機會狂搖部NGP博甩身，不過現場只係用咗《全民高爾夫NEXT》示範自轉360度睇勻全個球場，而呢個正係NGP其中一項想Sell嘅VR（虛擬現實）功能。因應以往用PSP玩《MGS Peace Walker》等遊戲時，要切換視點都比較麻煩，所以NGP就喺機身右方加入另一組Analog掣，轉視點方便咗好多，亦係第一部有雙Analog掣嘅手提遊戲機。

插卡單撈買新Game

除咗操作外，NGP嘅硬件規格都好強，用上四核ARM Cortex A9處理器，內置Wi-Fi、Bluetooth以至3G，能配合新加入嘅LiveArea以及Near功能，提供更全面嘅網絡應用。值得一提係NGP會飛走UMD，以後買Game會變成直接從PlayStation Store單撈，或以新開發的記憶卡形式推出，值得期待！

六廠齊撐NGP

截至兩日前為止，總共有48間日本遊戲廠商、16間北美跟18間歐洲遊戲廠將會支援NGP，不過好似Electronic Arts及THQ等歐美大廠暫時仲未上榜。現場除咗Activision未有任何示範外，其餘5間有份喺發布會上講嘢嘅遊戲開發商（Capcom、Sega、Tecmo Koei、Konami、Epic）都趕製到試片或試玩版本，其中Capcom最有誠意，唔單止有《Monster Hunter Portable 3rd》嘅NGP版示範外，仲有《Lost Planet 2》影片睇添；至於小島秀夫當然亦有帶來《MGS》嘅試片！