美國獨享X3製作真人Show

除非得到廠方授權，否則一般人都幾難走入車廠參觀，就算係獲得批准嘅觀光團，亦只能齋睇、唔畀影相。寶馬為滿足車迷，於是喺美國推出線上觀看汽車製作全過程，可以話史無前例。不過首要條件係訂購咗2011年嘅X3，仲要只限美國準車主，先可瀏覽得到，真係羨慕死人。

去年九月起，X3生產線由奧地利Graz搬咗去美國南卡羅萊納州嘅Spartanburg車廠，除咗第二代X3，其他X系型號，包括X5、X6都會喺度投產，依家喺美國落Order出X3，仲可以透過電腦睇到自己部愛車嘅製作過程。

七組鏡頭全程拍

寶馬透過設於廠內唔同區域嘅七組攝影鏡頭，記錄X3生產線嘅不同階段，包括車架焊接、零件組裝及打磨噴油等；呢啲片段並冇設定保留期限，換句話說，準車主可以無限期觀看、下載，甚至與朋友分享。想欣賞自己部愛車嘅製作影片，就要先喺寶馬嘅美國官方網站申請帳號，登入時再輸入埋定單號碼或車身號碼即可。

11.2萬平方呎大型廠房

至於斥資7.5億美元擴建嘅Spartanburg車廠，預計每年產量由16萬輛增至2012年嘅24萬輛，X3生產線就係其中一個擴建項目。廠房面積佔地11.2萬平方呎，設有先進嘅汽車製造機械設備，以及一個2.8萬平方呎嘅噴油及打磨工場，以迎合未來嘅生產需求。廠方亦希望每位客人睇到屬於自己嘅X3誕生會感到興奮，藉此加強品牌形象。希望繼美國市場後，同類型嘅「線上導賞」服務可以擴至其他地區，當然唔好漏咗香港啦！