得閒圍脖

Rowena：

同事Ling正密鑼緊鼓準備台灣之旅，不禁令我諗起去年今日與朋友的5人台灣遊。嗰次我哋由台北包車落台中同南投，印象最深刻係環境優美嘅清境農場，隻隻綿羊都「肥大無窮、食量似黑洞」，就連裝住乾糧嘅紙袋都唔放過，照樣搶住吞落肚！另外，同行嘅「團友強」响臨走前，竟然將酒店房間嘅廁所板一開為二！雖然證據確鑿但佢死口唔認，仲話塊板一早就爛鬼咗，秉承佢一貫嘅作風。

Yuk：

接線生是工作的其中一個崗位，一日閒閒地要接十幾廿個PR電話，計埋想借錢畀我嗰啲，試過一日講足卅幾個電話，講到口水都乾埋，所以放假都想離開香港，遠離電話鈴聲。上次就去咗韓國，專程去睇紅葉，一日行一個山，行足五日，終於如願以償，雖然荷包縮水、雙腳痠痛，但第一次睇到咁靚嘅紅葉，嗰刻真係好開心！點知早兩日行過中文大學，畀我發現著名嘅荷花池旁邊都有紅葉睇，落葉遍地，加上書香氣息，風景一絕，影出嚟嘅相，分分鐘仲靚過韓國嗰啲，不禁被同行友人揶揄：「睇紅葉使咩嘥錢去韓國」。惟有安慰自己：不一樣的心情，看不一樣的紅葉……

WL：

曾幾何時，新聞不時提到香港人每天製造若干多的垃圾，導致垃圾堆填區快將填滿，究竟當中有多少是真正的「垃圾」？早前訪問社會企業「Green Ladies女士衣飾二手店」，該店每年收集的舊物數量近2,000件，經篩選後賣給回收商，至於擺放在該店售賣的二手產品，不乏連價錢牌都未剪的「舊衣」；採訪期間，我就發現一條掛着「原價$150」的全新心形肩巾，現時定價只為$88。工作人員透露，根據經驗，收集得來的舊衣有一成屬於全新！我想：幸好有這類二手店，否則地球的資源就是這樣浪費了。如果人人購物前，肯冷靜的想一想，或許世界會少了這些無謂的犧牲。