送虎迎兔 賀歲Apps

「咚咚鏘！咚咚鏘！咚咚咚鏘咚鏘！」不經不覺虎年又即將過去，送虎迎兔，唔少人會出門拜年；但潮流興玩Apps，好似iPhone咁便有大量賀年新Apps畀大家下載，由計算來年運程、家中吉位，到發送賀卡、寫揮春都幫到你。

雖然好多人都話近呢幾年愈嚟愈冇新年氣氛，不過小記就唔係咁同意，好似今次介紹嘅iPhone Apps，可以製作新年鈴聲，又可以發應節短訊同玩遊戲，單撈一、兩個落部手機度，過年仲唔夠晒Feel。

《Chinese Horoscope生肖運程》免費指點迷津

就快踏入兔年，不少人都想知道來年的運程吉凶，可惜坊間的風水運程書都要付錢購買。呢款iPhone App就免費幫大家指點迷津，佢不單止提供十二生肖的每日運程資料，還可依據出生年月日，計算出吉位、幸運號碼及相生相剋生肖；最體貼係佢有埋英、日版本，就算介紹畀外國朋友用，佢哋都一樣睇得明。

《Chinese New Year Ringtons and SMS》應節短訊鈴聲

一到新正頭，人人例發賀年SMS，搞到網絡大塞車。唔想落後於人，最好是入定訊息，一夠鐘便發送開去。這個iPhone App就連編寫嘅工序都幫大家慳番，事關佢已經預載咗500多條賀年短訊範例，只要透過Group SMS功能，就能一次過發送給朋友。程式更送埋賀年鈴聲，想用《財神到》做Rington就記得下載。

《2011兔年家居風水布局》變身玄學大師

「今年桃花位在哪裏﹖」、「想要催財又該怎麼辦﹖」除非閣下是玄學大師，否則以上問題大多唔識答。呢個App的賣點之一，在於利用簡單方法，幫助大家了解兔年的吉凶方位所在。用戶只要跟隨指引，就能自擺「催財」、「桃花」及「文昌」等布局，搖身一變成為玄學大師。

《Festive Cam》自製型格賀卡

App Store內有大量新年e-card下載，但圖案唔係利是封就係炮仗，冇厘新意！這款《Festive Cam》就為潮人而設，它內置了52款搞鬼頭飾及圖案，用戶只要載入相片，就能自製出獨一無二的型格e-card。創作後更可經Facebook或電郵送給好友，夠晒環保！

《Mashimaro Defence》有趣賤兔遊戲

踏入兔年，就梗係要玩隻兔仔Game應吓節。呢款《Mashimaro Defence》由賤兔擔任主角，玩家只要利用廁所泵將進入畫面的動物趕走即可，看似簡單，但當動物一擁而上時就相當難纏。遊戲共設4大場景、3大絕招，玩法有趣，保證大人細路都啱玩！

《Funny New Year Scroll DIY》環保無味揮春

小記讀書時，每年過節都例必寫揮春，但其實此舉浪費紙張之餘，墨汁仲惡臭無比！若想環保啲，計我話不如用呢款揮春App。它預載咗多款精美背景，用戶只要輸入四字詞語，數個步驟便能製作出賀年揮春。美中不足係佢冇發送功能，整完惟有自己欣賞了。