HT鍾博士重見英氣福伯
《奪寶奇兵》堪稱冒險電影嘅經典，就算日後同類電影玩特技、玩CG，但係論到演員同故事布局，都難以匹敵，難怪《奪寶奇兵》嘅精品、玩具，喺30年後嘅今天依然叫好叫座，近期最令玩家期待嘅，首推Hot Toys製作嘅12吋鍾斯博士。頭雕似足真人，配件仲係質量俱全，皮鞭仲用埋真皮製成，將壯年期嘅福伯英姿重現人間。
到底《奪寶奇兵》玩具有幾受歡迎？數數歷年嚟參與過嘅廠商就知道，Medicom、SideShow、孩之寶、Lego……多不勝數，不過以Action Figure嚟講，大部分嘅水準都係得啖笑，仲未去到收藏級數，所以當HT喺日本10周年展發表鍾斯博士時，就引起《奪寶》迷高度關注。
金大師HT處女作
今次嘅頭雕有兩大賣點，首先佢係金享彥大師由Enterbay加盟後，第一款接受預訂嘅HT作品，夠晒紀念價值；其二係個樣似足當年嘅鍾斯博士，雙眼、輪廓以至鬚根都有清晰雕刻，難怪福伯本人睇過，都一Take過Pass。作為DX系列，鍾博士嘅另一特色係裝咗P.E.R.S.系統，雙眼可以360°轉動，配合眉頭緊皺嘅表情，望向邊都炯炯有神。素體方面，沿用狼人時開發嘅Muscular Body，解開衫鈕就Show到胸肌，仲有30個關節，幾大動作都應付到！
兩個Look似到足
服飾方面，皮褸用仿真皮製成，牛仔帽則係啤膠，另外斜布褲及皮鞋嘅仿真度都好高，做工拍得住真衫咁精細，美中不足係成個牛仔Look過於光鮮，加番少少舊化可更入戲。另外，過往DX系列都有兩個造型玩，今次都唔例外，隨盒送多套阿拉伯裝，有齊頭巾、長袍，最正係「拉雅之桿」跟足比例還原出嚟。其他配件亦好大堆頭，除咗10款替換手掌、兩把短槍、筆記簿及黃金神像外，仲有一條用真皮織成嘅皮鞭，能屈能伸，比其他廠商嘅一體成型做法，玩落更鞭鞭有力！
HT 1/6 《Indiana Jones and The Raider of the Lost Ask》
零售價︰$1,580
預訂價︰$1,550
推出日期︰2011年第三季
查詢︰2388 4677（玩具狂熱）
＊圖中為試辦款式，與正式推出的版本或有少許分別。
採用狼人Muscular Body，比例準確，仲有30個可動關節。
皮鞭用人手織成，可以捲起收喺腰帶，跟足電影造型。
皮鞋無論比例、反光度及車線都相當逼真，遠睇仲以為係真鞋。
DX系列賣貴咁多，配件自然勁大堆頭。
黃金神像係電鍍件，靚還靚，但近睇有啲似朗拿甸奴喎。
拉雅之桿係電影關鍵，HT當然如實造番出嚟。
用咗Muscular Body，解開衫領見到胸肌連胸毛，比一般Body更似真人。
金享彥嘅雕工毋須懷疑，首辦所見似足壯年期嘅福伯。
換上另一套阿拉伯裝，用料係麻布，衣領花紋亦跟足戲服。