《Mind Jack》 Hack入你身

呢兩年唔少廠商都出過以「上身」為題材嘅動作Game，遊戲入面主角身懷絕技，能夠盜取別人技能，甚至吸收對方肉體，變到一模一樣。最近呢種Hack人Concept就吹到日本，由大廠Square Enix操刀、玩意識入侵嘅《Mind Jack》，集西方射擊遊戲元素，兼備東洋格鬥風格，相當特別。

動作遊戲《Mind Jack》雖然响本地宣傳唔多，不過故事題材吸引，型男主角能夠控制其他志同道合嘅人幫自己殺敵，又或者入侵敵人意識實行鬼打鬼，仲可以揸槍玩隻揪，玩法夠晒多元化。

無辜捲入 恐怖活動

《Mind Jack》故事發生於2031年嘅未來世界，遊戲中擔當FIA搜查官嘅主角Jim，响機場遇上反國家運動分子女主角Rebecca，二人無辜捲入咗一場恐怖活動，佢哋雖然理念唔同，但都合力逃出槍林彈雨下嘅機場。經過連場激戰，佢哋到達咗Saint-Mira市，原來敵人早已布下天羅地網，仲暗中控制埋部分市民，將佢哋變成一堆冇晒意識、到處殺人嘅機器，連同敵方嘅機械兵同生化武器，一場身份互換、敵我難分嘅大戰一觸即發！

入侵意識 遙控殺敵

遊戲中最重要嘅兩個嶄新元素，就係Hack入別人意識嘅「Mind Hack」同埋「Mind Slave」功能。主角Jim可以利用「Mind Hack」佔據被捲入戰鬥中嘅市民體內，進行攻擊，例如街上遇到揸槍嘅市民，玩家可以加以入侵進行操縱。另一樣「Mind Slave」就有啲唔同，今次唔係直接操控別人，而係透過心靈控制將對方變成自己友，執行玩家嘅指令，強化自己陣容。另外，主角打贏敵人就會得到XP，儲夠XP就可以升呢，得到新增技能如增加體力、提升射擊命中率等！

連線互Hack 敵我難分

雖然呢款《Mind Jack》掛名係單人玩嘅作品，但只要透過PSN同XB Live就能夠實現最多6人連線廝殺。喺多人連線模式中，大家會分成「Blue」協力者同「Red」敵對者兩大陣營，大家可以利用「Mind Hack」互相入侵，到時真係敵我難分，行動時要格外小心！至於玩法方面，有一擊即死嘅「體驗主義之時間」，或者所有玩家互相廝殺嘅「殊死戰」，想合作定單打獨鬥，完全由你話事。

遊戲檔案

類型：動作

開發：Square Enix

平台：PS3、Xbox360

售價：$388（PS3）（a）

　　　$339（Xbox360）（b）

查詢：（a）2341 2356、（b）2418 8896