揀手靚海味靠望聞摸

農曆年向來是年度大節，挨年近晚，海味店例必人頭湧湧，皆因大家都趕緊辦年貨。團年飯、拜年都有份的鮑參翅肚，無論是自用抑或送禮，都可參考以下專家教路，靠望、聞、摸，揀盡靚貨，包保食得開心。

論海味店老行尊，點少得有70多年歷史的安記海味，總經理潘權輝表示：「今年經濟比往年好，無論鮑參翅肚都有一定客路，其中以鮑魚、元貝特別好賣。我們為吸引顧客，亦有推出特價品，像每斤$358的北海道宗谷元貝、$39.9半斤冬菇，反應亦好熱烈。」輝哥表示，想揀靚海味，離不開「望、聞、摸」3個步驟，優質貨定會外形完整、聞到海產的獨特香味，摸上手更是乾爽，他補充說，最好揀舊水（即存放時間較長）海味，因質素較佳。

靚鮑腰圓背厚

鮑魚一般分為乾鮑、鮮鮑（即急凍鮑）及罐頭鮑3種，其中乾鮑有吉品鮑、禾麻鮑及網鮑等。揀選乾鮑時，首先要看乾鮑外形，例如鮑身要完整無缺、腰圓肉厚、群邊要夠粗及拮手、珠粒分布均勻緊密，還要聞到乾鮑香味，摸上手要乾身，特別是表面起粉（即鹽霜）的最好。

海參拮手最好

海參非常健康，絕無膽固醇，而且含豐富蛋白質、鈣、碘等營養成分。海參約可分成刺參、豬婆參及禿參3種，以來自日本的刺參最矜貴。像豬婆參要皮薄肉厚、底部平滑及不要有水漬，因很易變壞；遼參香味夠兼入口爽滑，揀選時要看刺針是否夠粗、夠長及夠密，拮手的便是上品。

花膠切忌「花心」

靚花膠又名「清水花膠」，即花膠放在燈光下映照時非常剔透，而且紋理清晰；相反，如果花膠被照出有黑點或暗影，即「花心」，便不要購買，因這種花膠沒有完全曬乾，會帶腥臭味，以及容易變壞。

元貝金黃幽香

一等元貝均來自日本宗谷，揀靚元貝時，要看其顏色是否金黃，充滿光澤，全粒要布滿幼紋，中間更要有小裂縫，不妨再聞一聞元貝是否有香味，方才是上品。

魚翅淨頭最佳

魚翅以淨頭的最佳，即無骨、皮等雜質，外形呈金黃色，放在燈下照會見到通透、清晰的紋理，摸上手乾身亦很重要。但若發現魚翅內有一點點的鈣化物質，即所謂的枯骨翅，便不要購買。

燕窩不要雜質

燕窩對養顏護膚特別有功效，難怪深受女士們歡迎。靚燕盞顏色應是淡黃色，或是灰白色，而且要完整、少燕毛、少雜質及纖維密實，用手觸摸時以乾爽的最好，最後聞一聞燕窩味道，優質的會透出清香。