抵！唔瞓都要食夜燒

位於銅鑼灣的燒烤新店「三五亭日本燒鳥」，選用的伯方鹽，比坊間食鹽貴10至20倍。「因為純天然，有礦物質，不會太鹹，不會搶去食物原味。」店主阿誦邊解釋，邊說這裏的食物價錢是高級名店的三、四折，消夜時段更一律15蚊一碟。難怪，模特兒聽完都話：「唔瞓都要落嚟食燒物！」

眼前的金毛師傅兼店主阿誦手起鹽落，串燒雞軟骨翻兩翻，已香噴噴到不得了！「不會預先醃味，靠即時調味，因每種食材的厚度和體積都不同，做法亦有所不同。」師承自名店南蠻亭和燒鳥亭（後者乃名人食竇，佘詩曼、古巨基、陳奕迅也曾幫襯）的阿誦，今年自立門戶，不時會落場幫手，試過的人無不直豎拇指，加上價錢大眾化，實在值得推介。

以抵食吸客

小店「抵食」，全因阿誦19歲時已想做老闆，7年前由學徒做起，艱苦在所難免。「最初未知師傅要求，呢樣唔得，嗰樣又唔得，惟有不斷試。」後來，老闆到跑馬地開新店，阿誦即舉手要求跟過去，希望為日後自己開店打好基礎。「學識點樣開間舖、點樣留住班熟客、點樣入貨等，當時認識的食物供應商，今日已成了朋友。」累積足夠經驗後，阿誦想一試自己能力，得到家庭和伴隨十年多的老婆無限量支持。「大家一起捱，拍拖去街都會揀選消費相宜的地方。」到自己做老闆，會從顧客心態出發順理成章以「抵食」來吸引人。

消夜特價$15串

萬事俱備，只欠東風，就是店舖選址。其實阿誦很喜歡大坑，每星期總會走一趟，但發現食店太多：「若然喺大坑開店，我會不知自己的定位，揀謝斐道，雖然比較僻靜，但可自成一國，唔會太多人，私隱度也高。」能圓開業夢，全靠當時和老婆死慳死抵，深知不是人人都可捱貴價食品，故星期一至日都有消夜特價（10:30pm），如雞骨豬肉腸、豬頸肉、燒海老（海蝦）、車厘茄煙肉卷一律15蚊串，啱晒經常手頭緊嘅「月光族」。

查詢：2838 2285