Fax 儲入卡揀啱先Print Canon PIXMA MX886

依家通貨膨脹，百物騰貴，做生意嘅唔單止要有效率，仲要慳得就慳，好似每日收收埋埋一大堆推銷傳真，真係印少一張得一張！所以Canon最新推出嘅PIXMA MX886多功能打印機，只要插記憶卡，就會將收到嘅Fax全部儲存去，揀啱先Print，唔怕浪費，又夠晒環保。

呢部PIXMA MX886唔止識得幫你慳家，隨機附送嘅程式仲會喺冇墨時自動提你補購，仲要快到今日落單，聽日就收到貨，效率甚高，啱晒日理萬機嘅用家！

資料直存記憶卡

雖然現時好多多功能打印機，都具備傳真功能，但如果照單全收印晒出嚟的話，年中真係浪費唔少墨水同紙張，於是MX886就聰明地加入自動儲存功能，可以將日常收到嘅Fax直接儲存到記憶卡，並支援SD、MS Duo同CF卡，共三種流行卡種，資料儲存量比內置記憶體大得多，就算幾日唔記得收Fax都唔怕爆滿外，大家每日返工時只要將記憶卡插回電腦，就可以一次過瀏覽及挑選有用嘅傳真，揀啱再透過Wi-Fi打印都唔遲！

百變精明鍵盤

作為一部多合一相片打印機，MX886提供嘅功能梗係唔少，所以為咗簡化操作同按鍵布局，Canon特別增設咗一個雙功能操控介面，可因應唔同功能自動切換至不同模式，例如傳真時只會顯示數字鍵盤；影印時則會變成方向鍵，按鍵數目大減之餘，都冇咁容易按錯，加埋鍵盤旁邊有個3吋彩色LCD屏幕，揀選設定或預覽相片都咁方便。

冇墨提你補貨

此外，MX886隨機附送嘅軟件內置了智能補充墨水功能，當發現墨水唔夠用，就會從電腦自動連線到Canon Consumable Express網站，幫大家訂購所需嘅墨水，經用家確定後，第二日就收到墨盒，又快又唔怕訂錯型號，確係唔錯嘅服務。打印方面，MX886屬新一代PIXMA中最高階的一款，支援9,600×2,400解像度、5色獨立墨盒和1微微升墨滴，配合內置Auto Photo Fix II功能，會醒目地分辨相片是手動或自動模式拍攝，並會針對相片的白平衡、偏色和曝光不足等方面作出優化，令相片變得更亮麗自然。

機檔案

型　　　號：PIXMA MX886

打印解像度：9,600×2,400

墨　水　匣：5色獨立墨水

屏　　　幕：3吋彩色LCD

打　印　速　度：每分鐘12.5頁（A4黑白）

每分鐘9.3頁（A4彩色）

43秒（A4相片）

掃　　　描：2,400×4,800dpi

儲　存　媒　體：內置記憶體、SD、MS Duo、CF

介　　　面：USB 2.0、Wi-Fi 802.11b/g/n、PictBridge

體　　　積：491×448×218mm

重　　　量：11.7kg

同場加映

雙色墨盒 PIXMA MX426

如果印相需求不大，只用作文書處理及Fax接收的話，中階嘅MX426可能更加適合。皆因佢採用雙色墨盒，對於色彩用量唔多嘅朋友嚟講，會更經濟實惠；加上佢亦有Wi-Fi同記憶插卡功能，收發Fax同傳輸文件都同樣方便。

掃描更快 PIXMA MX416

雖然支援Wi-Fi無線打印嘅MX416，只有一個普通嘅黑白LCD屏幕，但打印效果一啲都唔差，最高可達4,800×1,200，而且掃描一張彩色A4/300dpi的文件只需14秒，比MX886還要快！

查詢：3191 2333