on.cc 東方互動主頁

自訂主題　包起花園BBQ團拜

每次拜完年，爸媽例必與姨媽姑姐打番幾圈，剩低一班後生無所事事，人多勢眾，想搵個地方Hea吓都難，好在旺角帝京酒店特別開放8樓的地中海花園，並變身成為露天燒烤場，由專人服侍來個任食海鮮BBQ自助餐，一於約埋班親朋戚友將花園包下來個大團拜，玩都玩得放啲啦！

最怕一大班人開Party，當然人多熱鬧更開心，但諗到要搵地方就頭痕，既要交通方便，又想靜靜哋唔受其他人騷擾。所以當知道旺角帝京酒店闢出8樓的地中海花園，供客人搞私人BBQ派對，小記即雙眼發光。

旺區中的後花園

小記的朋友一向作風古靈精怪，搞親Party應該唔會甘於齋燒烤咁簡單，例必找個主題去配合，例如「睡衣派對」、「制服誘惑」等，今期仲話要扮豬扮狗襯番農曆新年十二生肖咁話。玩到咁大？冇問題！但起碼要搵個旁邊唔會有太多陌生人的地方。帝京酒店最近首度開放平日只供住客使用的8樓露天花園平台，只要湊夠30人或以上，每人只需付$488，即可包場舉行私人Party，想點玩就點玩。只要經過酒店的泳池，旁邊便是今次的派對重地，有泳池咪會有好多住客望住囉？放心，泳池旁邊有圍欄相隔，香艷場面一概欠奉。另外，在場地的一邊有放滿頭盤甜品的長枱，另一邊則是舒適的座位，雖然地方不大，但四周布滿花草樹木，加上有個出晒煙嘅恒溫浴池，如此環境配合一身野性動物裝束，簡直Fit到爆，極有回歸大自然的感覺。

大廚服侍任食BBQ

玩到幾High、扮動物扮到幾狂野都好，都要醫吓肚，叫得做「私人戶外BBQ派對」，當然不少得燒烤食物。酒店出品，食物質素自然比坊間的燒烤場高級，服務亦更周到。酒店會派出兩名大廚坐鎮，幫大家即場燒製美食，共12款美食不是大路的魚蛋牛丸，而是澳洲羊架、美國安格斯牛肋骨、基圍蝦等高級肉類及海鮮，只要你柯打，便有專人送上，確保新鮮熱辣辣。另有十多款冷盤、甜品供應，前菜更有不同風味款式，如酸甜開胃的泰式柚子沙律、來自西班牙的風乾火腿、煙三文魚、西式鴨胸沙律等；甜品則以小杯形式登場，十分精緻，如燕窩芝麻慕絲及木糠布甸等，款款都由大廚精心烹調，另還有腐竹雞蛋糖水這款港人最愛的滋潤糖水。平時到酒店吃自助餐，動輒數百元，今次以同等價錢，便可包起個場給大家盡情玩樂，我覺得真係正喎！