拉斯維加斯直擊 CES 2011第二彈 靚聲過iPod Samsung Galaxy Player
作為每年科技界頭號盛事嘅CES消費電子展，日前在美國拉斯維加斯正式舉行，今年共吸引到2,700間廠商參展，當中又以Samsung展館最大，產品涵蓋電視、PMP、手機、相機及3D藍光播放器，小記行足一日都行唔晒！現場所見，最多人圍觀同玩嘅就係Galaxy Player，4吋大芒睇到片、聽到歌，仲係使用Android 2.2系統，代表有無限Apps任玩；實聽下靚聲過iPod，樂迷終於可以有多個選擇了！
近年Samsung成日硬撼Apple，手機有Galaxy S打iPhone，平板電腦有Galaxy Tab對iPad，而今年更會將戰線擴展至隨身播放器，就係用Galaxy Player硬撼iPod，而且更有YP-GB1及YP-G50兩個型號，實行雙線發展夾擊對手。
4吋巨芒聲畫一流
如果齋睇外形，Galaxy Player YP-GB1同Galaxy S有9成相似，但就抽起了通話功能，並在機背加入立體聲喇叭，因此即使不插3.5mm耳筒亦能聽到環迴立體聲。規格方面，佢內置4吋WVGA Super Clear LCD、320萬像素鏡頭及802.11n無線網絡模組，每一瓣都勝過對手；最重要係佢行Android 2.2系列，用到晒Google服務之餘，還可透過Samsung Apps平台不斷下載新程式，功能勁過晒時下嘅PMP多多聲。若嫌YP-GB1定位太高，同期還有YP-G50可選，細如八通達，更啱女仔用。
3D電視框幼過支筆
除了PMP，Samsung亦沒有忘記老本行平面電視。數數手指，今年展場共展出了超過40款Smart TV，尺寸由16吋至65吋不等，而當中最多人圍住睇嘅係全新3D LED TV D8000系列。D8000為C8000的後繼機款，最大亮點係邊框比正常縮少近80%至只有0.2吋；現場勁多人用間尺度，小記就簡單啲用原子筆比較，真係名副其實仲幼過支筆，誇張！D8000將於今年上半年上市，同期還會有次一級嘅D7000系列，邊框同樣咁幼，並內建Wi-Fi功能，可透過Smart Hub跟其他電子設備連接。
薄切電腦勝過MBA
Samsung勝在產品線較闊，嗰頭打完iPod，呢頭又打MBA。講緊嘅係最新Notebook 9系列，13吋屏幕只有1.31kg重、16.3mm厚，輕薄過對手；而且用咗160GB SSD硬碟後，開機時間只需12秒，爽到暈！嫌Notebook傳統得滯，同場還有全球首台2合1 Hybrid電腦︰Sliding PC 7，正常係Tablet PC，擁有10吋觸屏，但滑開屏幕後就會變成Notebook形態，並有齊Qak-trail Z670處理器、2GB記憶體、HDMI輸出及藍芽3.0等配套，實行一物兩用。
YP-GB1外形同Galaxy S手機差唔多，容量有8GB及16GB兩款，今個月就會喺南韓開售。
YP-G50功能相若，只係機面縮細至八達通大小，手感更佳。
4吋芒睇片勁爽，最正係有埋立體聲喇叭，聲音平均輸出，唔會偏埋一邊。
D8000邊框幼到睇唔到，而且採用了改款後嘅Quad Stand四面底座，靚仔成咁，無怪乎可攞到今屆CES創新設計暨工程獎。
今年Plasma TV亦會進化至Series 8系列，64吋屏幕兼睇到3D，勁震撼！
現場還展出了75吋Full HD 3D LED TV，誇到有成個人咁高。
唔係呃你，拍埋邊框一比，真係幼過原子筆！
Notebook 9採用硬鋁材打造，夠輕夠薄之餘，硬度仲係一般鋁材嘅兩倍。
Sliding PC 7推開屏幕後就會變成Notebook，唯一缺點係續航時間只得8個小時，唔夠長氣。
今次展出的所有Smart TV都支援新開發的Smart Hub服務，將電視、電腦及移動設備集中處理。
D8000邊框得0.2吋咁幼，Samsung索性將佢當成油畫擺放，現場所見難分真假。
今屆CES共有過2,700間廠商參展，當中又以Samsung的展館最大。
懸浮3D電腦屏幕
電腦屏幕今年將陸續3D化，旗艦級產品係SyncMaster TA950，懸浮設計本身已夠晒型，仲內置埋TV Tuner，可當埋電視機用。
300吋立體投影
講到畫面尺寸始終係投影機最大，呢款SP-A8000就能投射出300吋立體畫面，現場就有勁多人試睇。
全球最輕3D眼鏡
相中人所戴嘅SSG-3700CR主動式快門3D眼鏡就偷輕至0.06kg，不但全球最輕，仲可以更換鼻樑位及近視鏡片，四眼人士唔使戴孖鏡，設計勁貼心。
遙控器串流煲劇
Samsung今年還會力推觸控式電視遙控器，將電視畫面串流至3吋屏幕上，去廁所都可以繼續煲劇。
最薄藍光播放器
另一款3D藍光播放器BD-D7500則係全球最薄，厚度僅有0.9吋，仲薄過唔少手機。
NX11像素升呢
作為NX10後繼版嘅NX11，主要是改良了韌體及把手位，可拍攝1,460萬像素相片及對應i-Function鏡頭。