Mitsubishi ASX 4WD 唔嘥油

點解愈嚟愈多後生仔女出SUV？因為門檻低咗嘛！近年嚟好多歐、日車廠都發覺小型SUV大有可為，論馬力、豪氣，當然唔及大型SUV，不過好玩指數就冇輸蝕，操控靈活易上手，最緊要係車價$30萬樓下有交易。好似三菱（Mitsubishi）嘅ASX，有齊SUV嘅絕招—四驅及實用車廂外，個樣又夠Young，而且$249,900就出到！

傳統SUV，引擎c.c.有番咁上下，喺香港未必用得着，況且油費又點會平？新一代嘅LSUV就反其道而行，ASX更係表表者，事關佢副偈只係1.8公升直四，算得上係行貨SUV之中最細級別，廠方公布嘅綜合耗油數字只係15km/L，以目前油價計算，即係$1/km左右，普羅車主都負擔得嚟。

身輕底盤紮實

擔心1.8直四唔夠用？睇番性能數字，馬力及扭力分別係139ps及17.5kgm，的確唔算有驚喜，中規中矩啦，不過廠方特登將車身輕量化，所以車重只有1.435噸，而ASX嘅速度表現，其實拍得住2.0。而且車身輕，起步、加速分外輕盈，筆者全程用四驅，喺飛鵝山上上落落，ASX都好肯去，底盤仲好紮實呢！

ASX唔只輕功了得，驅動模式仲靈活多變，有「2WD」、「4WD」及「4WD LOCK」任你揀。今次試車選用4WD，系統先以前輪驅動起步，之後會密切監察路面情況，再將適當嘅動力分配到後輪，最多做到50：50，既有四驅效果，又唔會因為鎖定四驅而嘥油，現時大多數嘅中小型SUV都做唔到。

煞食房跑Look

除咗養車成本低，吸引到年輕嘅新牌一族外，ASX個Look都有好大功勞。唔似大型SUV咁老氣橫秋，ASX嘅車頭面譜都幾似同廠嘅房跑王「露筍」，大大塊梯形鬼面罩，加埋一對上揚嘅大頭燈，成部房跑咁款，至於大幅度外拋嘅輪拱、深刻有力嘅腰線，將跑味激化。

車廂方面，ASX採用五座位布局，後排仲有驚喜，事關腿部空間比想像中寬敞，高佬一族都可以放心安坐；不過有利亦有弊，老實講，尾箱空間唔算大，相信係為咗遷就後排所至。至於時下流行嘅大天幕車頂，ASX都有，打開遮光板，車廂當堂光猛晒，心情都開朗啲啦！

車檔案

車　　型：五門五座位SUV

引　　擎：直四MIVEC

容　　積：1,798c.c.

最大馬力：139ps/6,000rpm

最大扭力：17.5kgm/4,200rpm

驅　　動：前置引擎、四輪驅動

傳　　動：INVECS-III六前速Sport Mode CVT

懸　　　掛：（前）麥花臣 （後）多連桿

制　　　動：（前）透氣碟 （後）實心碟

車　身　體　積：4,295×1,770×1,625mm（長×闊×高）

綜合耗油量：15km/L

售　　　價：$249,900

查　　　詢：2721 1111（環宇汽車）