我為武狂 女生爭入貨

金城武、吳彥祖、陳冠希,邊個最靚仔呢?我問過10個女同事,9個都答係金城武,可惜男明星冇出攬枕,否則一定搶購一空。「武癡」唔使失望住,事關Enterbay終於攞到授權,正式推出金城武12吋Figure,而且係最經典嘅鬼武者古裝扮相,配合超像真頭雕,唔只Game迷,睇怕唔少女生都會加Action Figure陣營。

作為Capcom電玩名作,咁多年嚟《鬼武者》都出過唔少玩具,不過以食玩為主,論神似度及可玩性,同今次嘅12" Figure冇得比。據Enterbay表示,其實早喺三年前已經傾版權,但由於Capcom要求嚴謹,直到今日先正式審批Pass。

頭雕九成似

單從頭雕嚟講,韓籍大師YJ依然保持水準,頭髮、眼神、臉頰都同遊戲中嘅明智左馬介有九成似,而且眉頭深鎖,更型更Man。而素體方面,沿用葉問嘅RM-004 Body,獨立關節超過12個,着埋層層疊嘅PVC盔甲,表面有皮革質感之餘,盔甲之間仲留有虛位,唔會影響活動能力。

武器落重料

《鬼武者》出過三集,Enterbay用咗第三集做藍本,金城武人氣高固然煞食,最重要係第三集主角嘅武器配件最豐富。今次Enterbay亦落重料,例如右手嘅「鬼之篭手」用ABS透明膠珠打造;腰間配刀「天雙刃」嘅刀身仲係金屬件,質感當然勝過金屬塗裝。其他武器方面,除咗有「打刀明智拵」、「地轟斧」及「空牙刃」,就連爆機後先出現嘅「毘沙門劍」,亦跟足1/6比例做埋出嚟。雖然以上武器都係ABS膠料製造,不過Size實在大,Figure拎喺手難以平衡,擺甫士時要多花耐性。

查 詢︰2332 3615(Enterbay)

去邊度食聖誕大餐好?
即上on.cc東方互動《享樂聖誕2010》專輯,為您一站式搜羅各類聖誕消費情報!

Gilbert

造型取材自《鬼武者3》嘅明智左馬介,為咗增加靈活性,採用咗經過改良嘅RM-004素體。

跟足遊戲設計,盔甲之下仲有幾層上衣,表面嘅網紋衣仲夠晒彈性。

草鞋真係由麻繩製成,唔怪得咁有質感。

盔甲之間留有虛位,擺甫士唔會頂住頂住。

右手嘅「鬼之篭手」用ABS透明膠珠製成,透光度高。

頭雕都算神似,可惜冇送埋變身後個Look,否則就可以玩齊兩個造型。

空牙刃(右二)及地轟斧(右一)等大型武器都有,Parts夠晒豐富。

Enterbay 1/6《鬼武者3》明智左馬介零售價:$1380