得閒圍脖

科技版記者貓科：

早前東芝在影音展CEATEC 2010中曝光的20吋3D裸眼電視20GL1，已於剛過去的聖誕節在日本正式發售，售價約24萬日圓（約HK$22,800），由於尺寸偏細，故即使是業界首部3D裸眼電視，但售價亦不算太貴。相比起現時流行的主動快門式3D電視，裸眼電視的最大優點是不需佩戴3D眼鏡就能欣賞到立體影像，配合Cell Broadband Engine影像處理晶片以及829萬像素屏幕，解像度約是Full HD的4倍，3D影像清晰細膩，希望香港代理會快點引進。

科技版記者Alfred：

去年小記最後買嘅一件玩具，就係魂限定版嘅威龍2號同3號，訂咗起碼半年先到貨，真係等到頸都長！小記自細就鍾意玩玩具，80、90年代所有香港有播過嘅機械人卡通片，統統都陪住我成長，想當年嘅《機甲武士劍》、《魔神英雄傳》、《天威勇士》等，都係小記嘅最愛。不過人愈大就愈鍾意有實戰Feel嘅機械人，因此我就睇中咗香港冇播過嘅《威龍戰記》，當中威龍1號機早已喺幾年前入咗手，依家連2號及3號都入埋，佢哋終於一家團聚喇。

科技版記者Vincent：

雖然《MHP3》都出咗成個月，不過要搵齊四位朋友出嚟升HR、打怪都唔係咁容易。想安坐家中同人連線對打嘅話，小記就推薦大家用Xlink手指。其實呢隻手指都推出咗好幾年，而且有唔少玩家都投訴連唔到線，不過日前小記將封塵嘅PCI Xlink手指拎番出嚟，再用埋Xlink Kai程式，依然可以同其他網上玩家對打。講真一句，Xlink手指嘅Setting都幾複雜，電腦、手指、程式以至PSP都要慢慢調校，但一諗到足不出戶就可以聯群結隊屠龍，就乜都抵番晒！